Eg kundi spælt við Liverpool

Jákup á Borg er eitt væl kent navn í føroyskum fótbólti. Hann kom á fyrsta lið hjá B36 sum bara 16 ára gamal, og vann sítt fyrsta meistara­heiti longu árið eftir. Í 1998 bleiv hann toppskorari í før­oyskum fótbólti og fekk lands­liðs­boð.
Tað gekk so væl, at Liver­pool bjóðaði honum til royndar­venj­ingar, men hóast Liverpool vóru væl nøgdir, so broytti eitt venjara­skifti og ein nýggj royndar­venjing alt.
Í 1999 verður hann á øðrum sinni toppskorari. B36 vinnur aftur FM í 2001.
Jákup vinnur sær fast pláss á landsliðnum, men hóast ymisk til­boð, so gera góðu treytirnar tað gott at liva í Føroyum.
Síðst í 2002 missur Jákup sína stóru fyrimynd, tá stóribeiggin Høgni á Borg doyr einans 32 ára gamal. Í dag, tíggju ár seinni, fyllir hann framvegis nógv í hjartanum og fyrireikingunum hjá Jákupi til hvønn dyst.
Í 2004 skiftir Mr. B36 til HB. Tað sendir ein skelk gjøgnum før­oyska fót­boltsheimin. Fyrsti dyst­urin er móti B36. Skelti við áskriftini »Judas á Borg« eru at síggja í Gundadali.
Jákup spælir í HB fram til á sumri 2008, tá hann skiftir aftur til B36. Í 2011 vinnur hann aftur meistaraheitið.
Jákup á Borg hevur spælt 61 landsdystir, men kundi havt spælt nakrar afturat. Hann hevur nú endaliga sagt farvæl við landsliðs­fót­bólt.
Hann er 13 mál frá at gerast mest skorandi spælarin í før­oysk­um fótbólti.

Bara fótbóltur
Jákup á Borg býr í dag í Hoyvík har hann saman við konuni, Susi, hevur bygt hús. Har búgva tey saman við børnunum, Fríði og Anna. Fyrstur at taka ímóti er tó eitt ára gamli Prince. Hann er skeptiskur og ikki fyrr enn hann hevur kannað nýggjan gestin gjølla, gevur hann tekin um, at Sosialurin kann koma inn. Prince er av hundaslagnum Mops, sum vit eisini kenna úr filminum Men in Black.
Børnini eru farin í song. Tað er myrkt og kalt uttanfyri. Útsýnið í stovuni er gott. Jákup hevur skriv­að sær nøkur ting niður, tí minnið hevur hug at arga, tá tos­ið fellur inn á gamlar dystir og hend­ingar.
Jákup er næst yngstur av fýra. Hann er uppvaksin í einum fótbóltsumhvørvi í Konmans­mýru. Hvønn dag er fótbóltur á skránni í grannalagnum, og tað eru ikki ókend nøvn í føroyska fót­bóltsheiminum, sum talan er um. Jan Dam, Mikkjal Thomassen, Sigfríður Clementsen, Jón Rói Jacobsen og Vagnur Mohr Mortensen eru nakrir av teimum, sum eru uppvaksnir har á leið.
Í skúlanum hevur Jákup ilt við at sita í fri og lurta, men er ikki bein­leiðis óskikkiligur.
– Í dagsins samfelagið hevði eg sikkurt verið stemplaður sum DAMP og fingið eina rúgvu av heili­vági fyri tað, sigur Jákup skemt­andi.
Hann hevur altíð livað við full­ari ferð, og soleiðis var eisini í fólka­skúlanum. Í fríkorterinum er eisini fótbóltur á skránni. Tað ræður um at verða fyrst í skúla­garðin og finna sær eitt mál, og njóta tað so leingi sum til ber. Tí hvørja løtu komu tey eldru børn­ini, og verða Jákup og teir bara skumpaðir til viks.
Jákup byrjar sum heilt ungur at venja við B36. Tað er sonur ein av stovnarunum, Eiler Mouritsen, sum hálar ein ungan Jákup á Borg við til venjing.
– Eg var ótrúliga heppin sum ungdómsleikari. Eg hevði venj­arar sum Annfinn Danielsen, John Klein og Jacob Thomsen. Teir gingu upp í tað við lív og sál. Eg hevði eisini núverandi B36 for­mann­in, Sámal Ímundarsson, sum venj­ara eina árið, sigur Jákup.
Menn sum Hallur Johannesen, Halgir Arge, Bárður Lava, Gutti Winther, Dánjal á Neystabø, og René Tórgarð eru á liðnum. Teir vinna fleiri gullheiðursmerki.
Í 1996 er Jákup á Borg fyrsta árs unglingur, men tá eru boð eftir honum á besta liðnum.
Dreyma byrjan
Lívið í bestu deildini er hart, men Jákup fær góða vegleiðing. Longu sum 16 ára gamla skal hann royna seg millum menn, sum hann ann­ars bara hevur sæð upp til. Venjari hjá B36 er Jógvan Norðbúð. Hann dugur at skilja, at Jákup er ungur og óstøðugur í sínum avrikum. Eisini verju­kempan, Óli Johannesen, kem­ur til felagið. Tað hevur stór­an týdning fyri menningina av Jákupi.
– Óli er kanska tann fótbólts­spæl­arin eg havi størst virðing fyri. Hann lærdi meg nógv tá eg kom upp á besta liðið, sigur Jákup.
Hann hevur tað fyri at spæla góðar dystir móti HB. Í seinasta dyst­inum í kappingaráinum 1996 vinnur B36 á HB. Jákup á Borg stað­festur sigurin til 2-0 stutt fyri tíð. Unglingurin hevur upp á eitt ár bitið seg fastan á besta liðnum. Tað merkist eisini uttanfyri vøllin.
– Brádliga sat eg í Casablanca og drakk øl saman við stórum per­són­ligheitum í føroyskum fótbólti. Hetta hóast Muldi altíð hevði strengt 21 ára aldursmark. Men so­leiðis var, tá tú spældi við besta lið­num hjá B36, greiður Jákup smíl­andi frá.

Sivic kemur til B36
Jákup hevur hug at framhevja tríggjar venjarar, sum hava gjørt nógv fyri hann sum fótbóltsspælara. Ein teirra er Tomislav Sivic, sum í 1997 verður leikandi venjari hjá B36. Hann er úr gamla Jugoslavia og hevur frammanundan verið venj­ari hjá VB.
B36 liðið er gott. John Petersen kemur afturat úr GÍ, og hópurin telur menn sum Egin Høgnesen, Tummas Eli og Jens Kristian Hansen, Óla Johannesen og Julian Johnsson.
Føroyska sinnalagið verður rulla saman og tveitt í eitt ruskílat. Menn skulu út at renna.
– Eg minnist onkrar av renni­venj­inginum hann plagdi at hava. Tær vóru púra ørar í høvdinum. Men tú hevði einki val, tí Tomislav rann sjálvur fremst og orkaði best, greiður Jákup frá.
B36 spælir ikki altíð so væl, men mangan er nógva orkan munurin á liðnum. Um summarið er Inter Toto Cup á skránni. Ein av uppgávunum er ein útidystur móti FC Panachaiki Patras úr Grikkalandi.
– Fyri at venja okkum við hitan kravdi Tomislav, at vit ein heitan summar dag í Gundadali skuldu venja í fleiri løgum av troyggjum og buksum. Slíkt hevði aldrin gingið í dag, men soleiðis vóru tingini bara tá, sigur Jákup og grínur.
Kappingarárið endar við fyrsta FM heitinum í longri tíð. B36 vinn­ur avgerandi dystin í Vági 2-1, og túr­urin til Havnar við Smyrli gerst ógloymandi.
Í 1998 og 1999 verður Jákup á Borg toppskorari í føroyskum fótbólti. Liðið er ótrúliga gott, men tað blívur ikki til nakað gullheiðursmerki. Hvørki í landskappingini ella steypa­kappingini.
– John Petersen eigur ein stóran heiður av at eg gjørdist toppskorari hasi bæði árini. Ikki tí, eg legði eisini upp til nógv mál hjá honum, men hini liðini dekkaðu hann altíð við tveim­um monnum, og tað gav mær meiri pláss, sigur Jákup.
Jákup er nú mentur til ein lykla­leikara á B36 liðnum, og hevur fing­ið landsliðsboð á fyrsta sinni.
– Tomislav gjørdi meg til tann spælarin eg var tá. Onkuntíð hugsi eg, at fleiri av teimum ungu leik­ar­unum í dag kundu trongt til at havt Tomislav til venjara í eina tíð, sigur Jákup.
Prince liggur og hálvsvevur á sof­uni, men lukturin av nýggjum kaffi fær hann at rakna við.

Kundi spælt í Liverpool
Góða gongdin í heimligu kappingini ger, at Jákup fær ein møguleika at venja við søguríka enska fel­ag­num Liverpool. Jákup í Stóru­stovu er við at fáa fótin fyri seg sum umboðs­maður á altjóða markn­aðinum. Jákup á Borg hevur árið fyri verið sam­an við Heðini á Lakjuni og royndar­vant í Watford, men einki spyrst burturúr.
– Eg hoyrdi, at teir vildi hava okk­um báðar ella ongan. Eg havi ikki uppspurt akkurát hvat tað var, sum hendi, men skiftini koma so ongan­tíð upp á pláss, greiður Jákup frá.
Um summarið 1998 fer Jákup so á fyrsta sinni til Liverpool. Hann býr hjá eini eldri konu og útsýnið er Anfield – heimavøllurin hjá Liver­pool.
– Hetta var óveruligt hugsaði eg, tá eg fyrsti ferð hoyrdi um møgu­leikan. Eg hugsaði eisini, at eg kundi ikki fortelja teimum, at eg eri íðin Manchester United viðhaldsmaður. Tað endaði við, at eg fjaldi meg sum ein Tottenham viðhaldsmann. Tað gekk, sigur Jákup.
Stóra stjørnan í Liverpool um hetta mundið er Michael Owen. Jákup er smæðin uttanfyri vøllin og sigur ikki nógv. Hann torir ikki rætt­iliga at eta saman við hinum, men á vøllinum er øðrvísi.
Royndarvenjingin gongur væl, Jákup spælir dyst við eykaliðnum. Á liðnum tann dagin eru menn sum Robbie Fowler, David James, Jason McAteer og nakað minni kendu norrmenninir, Stig Inge Bjørneby og Bjørn Tore Kvarme, ið eisini spældu á besta liðnum. Liverpool vinn­ur dystin og Jákup spælir væl.
– Serliga David James var stutt­ligur minnist eg. Eftir dystin søgdu teir við meg, at teir vóru glaðir fyri tað teir høvdu sæð, og gjarna vildu síggja meg eina ferð afturat, sigur Jákup.
Til hetta kappingarárið er frak­lendingurin, Gerard Houllier, komin afturat venjaratoyminum. Hann virk­ar sum høvðusvenjari saman við væl lýdda Roy Evans.
Jákup kemur aftur til Liverpool eftir kappingarenda í 1998, men nú riggar einki.
– Alt tað sum riggaði væl fyrru ferð, riggaði illa hesaferð, sig­ur Jákup.
Hann venur við eykaliðnum, og spælir fleiri dyst­ir. Millum annað er hann á liðið saman við Steven Gerrard, sum í dag er lið­skip­ari í Liverpool.
– Eg minnist at onkur peikaði á hann og segði, at hasin fór at blíva góður. Tað bleiv hann so eisini, sigur Jákup.
Mitt í seinnu royndar­venj­ingini verður kallað inn til fund, og ein tárandi Roy Evans leggur frá sær. Tað var serliga gjøgnum Roy, at Jákup og Jákup vóru endaðir í Liver­pool. Nú var hann burtur.
Jákup metir í dag, at blivu kort­ini spæld eitt sindur øðrvísi, so hevði hann kunna fingið sáttmála við Liverpool.
– Eg hevði kostað teimum millum lítið og einki. Tað er nemt at siga í dag, men kanska skuldu vit sagt nei til seinnu royndarvenjingina. Teir høvdu sæð tað teir skuldu fyrru ferð­ina, og so trýst teir eitt sindur. So kundi eg kanska havt spælt í Liver­pool, sigur Jákup.

Enn eitt meistaraheitið
Í 2000 verður Tomislav útskiftur við svenska ítróttarsálarfrøðingin Per Olov Andersson, eisini nevndur Pelle. Tað er ein kolvelting í mun til tann harða Tomislav.
– Tá tað gekk illa skuldu vit standa í ring, og tosa við viðkomandi til hann kom í gott lag aftur. Tað var bara ein ov stór broyting, sigur Jákup, sum enn tann dag í dag hev­ur samband við Pella, sum ikki gjørdist gamal sum venjari hjá B36. Pjotr Krakowski tók yvir áðrenn kapp­ingin endaði.
Í 2001 vinnur B36 aftur meistara­heitið. Liðið er væl mannað og fýra teir fremstu eru Jákup á Borg, John Petersen, Heðin á Lakjuni og Magni á Lakjuni.
B36 vinn­ur meistara­heit­ið í Gunda­dali móti HB við máli, sum Heðin á Lakjuni skorar. Jákup, sum er í skúla í Danmark verð­ur flogin heim til dystin, men spælir bara tjúgu minuttir.
– Eg fekk eina ógvu­sliga takling og mátti av vøll­inum. Eg fór inn í skifti­rúmið og fór bara at gráta. Eg fekk næstan einki við av dyst­inum, sig­ur Jákup, sum tó kundi fegn­ast saman við liðfeløg­unum eftir dyst­in.
Í 2002 og 2003 gongur væl hjá felagnum, men Jákup kennir á sær, at hann er so smátt við at steðga upp.
Tað endar við, at sáttmála­sam­ráð­ingarnar slitna, og Jákup á Borg ger eitt tað mest umtalaða skiftið í føroyskum fótbólti.

Mr. B36 til HB
Í 2004 fyllir HB 100 ár. Teir gera nógv burturúr, men ongin hevði vænt­að, at Jákup á Borg skuldi eiga nakr­an lut í tí føðingardegnum. Hann var jú Mr. B36.
Jákup er sjálvur tvørur av natúr, men við samráðingarborðið møtir hann einum manni, sum heldur ikki vil boyggja seg. Tað er formaðurin í B36, Kristian á Neystabø.
– Vit eru kanska nokk so líkir, og tað var nokk eisini tað, sum gjørdi at vit ikki komu á mál. Í veru­leik­anum so snúði tað seg um einar 500 krónur. Eg stóð við mítt og hann við sítt, greiður Jákup á Borg frá.
Samanhaldið millum leikararnar í grannafeløgunum var gott tá, og Jákup hevði millum annað ar­beitt saman við Rúna Nolsøe í Thomas Dam. Tað kemur millum ann­að honum, Hans á Lag og Halli Danielsen fyri oyra, at alt ikki rugg­aði rætt í B36 viðvíkjandi Jákupi á Borg.
– Eg hevði áður fingið bjóðað tví­falda løn frá feløgum á bygd, men tað hugsaði eg ikki ein gongd um. Tankin um at skula koyra til eitt nú Toftir og venja í vindinum har í mun til pottin í Gundadali kom ikki upp á tal, sigur Jákup.
Tað endar við, at Jákup á Borg skiftir til HB. Familjan stuðlar hon­um, men onkur av garvaðu við­halds­fólkunum vildu ikki heilsa upp á hann longur.
– Eg var glaður fyri allan tað stuð­ulin eg fekk, men eg skilji eisini tey fólkini, sum ikki vildu heilsa upp á meg. Tey elska jú sítt felag so nógv. Tað er jú tað fótbóltur snýr seg um, sigur Jákup ásannandi.
Jákup verður útleigaður til OB fyri kappingarbyrjan, og fyrsti dyst­urin í HB troyggjuni er móti B36. Í Gundadali hanga skelti við áskrift­ini »Judas á Borg« og »Svíkjari«. HB er nógv tað betra liðið og vinnur 5-2.
– Tað var Allan Dybczak, sum hevði skipað fyri, at allir dreingja­liðsleikarnir hjá honum skuldu ýla eftir mær. Hann er í dag íðin HB við­haldsmaður, sigur Jákup og flennur.
HB vinnur greipuna tað árið.
– HB var eitt heitt felag at koma til. Øll í familjuni vóru væl móttikin. Eg angri ikki at eg skifti til HB. Eg eri 100 prosent har eg eri, og tað var eg eisini í HB, sigur Jákup.

Ferðin heim aftur
Jákup á Borg spælir í HB fram til 2008. Í 2005 tapir HB FM finaluna fyri B36, sum harvið vinnur meist­ara­heitið. Í 2006 kemur Krzysztof Popczynski til HB. Jákup á Borg hevur sítt besta persónliga kapp­ingar­ár, og verður kosin til ársins leikari.
Jákup nevnir Krzysztof sum ein av teimum trimum venjarunum, sum hevur givið honum mest sum fót­bóltsspælara.
– Hann kravdi nógv av okkum, men hann kravdi so sanniliga eisini nógv av sær sjálvum. Slíkt smittar av upp á okkum spælarar, sigur Jákup.
Krzysztof verður heldur óskilj­andi koyrdur frá árið eftir. Í 2008 stílar HB høgt. Fróði Benjaminsen og Christian Høgni Jacobsen koma til felagið, Andrew av Fløtum kemur aftur niðri frá, og Rúni Nolsøe er nýggjur venjari.
Undan kappingarbyrjan verð­ur atkvøtt um hvør skal verða lið­skip­ari. Tað verður Jákup á Borg. Á vøll­inum gongur einki hjá HB. Tað endar við, at Rúni Nolsøe velur at taka liðskiparabandið frá Jákupi.
– Eg kendi tað sum eg bleiv gjørdur til syndabukk. Eg og Rúni hava altíð verið væl, men tað broytti alt. Tað er ikki fyrr enn í ár, at eg veruliga havi tosað við hann aftur. Eg eri vísur í, at boðini komu aðra­staðni frá, sigur Jákup.
Í summarsteðginum fer Jákup til Danmarkar við familjuni, tá tele­fonin ringir. Tað er formaðurin í HB, Birgir Enghamar.
– Hann sigur, at Kristian á Neystabø hevur havt ein fyri­spurn­ing um at fáa meg aftur til B36, og at HB ikki vil standa í vegin, sigur Jákup.
HB velur í nógvar mátar at stuðla Rúna í stíðnum teirra millum. Ein mánað seinni verður Sámal Erik Hentze settur sum venjari saman við Rúna.
Í B36 verður Jákup væl móttikin aftur. Felagið siglir í tungum sjógvi komandi tvey árini, men Jákup lær­ir nógv sum fótboltsspælari.
Í 2011 vinnur B36 aftur meistara­heitið. Jákup hevur eitt gott kapp­ingarár, og samanspælið millum hann og Lukasz Cieslewicz minnur Jákup um samanspælið millum hann og John Petersen.
Venjari er Mikkjal Thomassen, sum er tann triði venjari, sum Jákup metir hevur givið honum nógv sum fótbóltsspælara. Mikkjal er mál­rættaður og venjingarnar eru lagd­ar væl til rættis. Hann hevur eisini heilt serligar eginleikar at motivera lið­ið undan dysti, og veit nær hann skal brúka tær ymisku talurnar.

Sjálvt Hvalbingar øtast við
Ongantíð hevur Jákup á Borg verið so bangin, sum tá B36 í 2002 mátti suður við lítlum báti, tí streyka var. FSF sýtti fyri at flyta dystin og so var einki at gera.
– Eg veit ikki hvussu stórur bát­urin var, men vit passaðu akkurát í hann, sigur Jákup.
Tað er síðst í Apríl og Tróndur Vanthamar hevur tikið luftbyrsina við og skjýtur frá hond eftir fugli. Við á ferðini er eisini Julian Florescu. Rumenin er bangin sjálvt um veðrið er gott á veg suður.
– Vit tapa dystin í kolandi stormi og hugsa bara um at sleppa avstað aftur, greiður Jákup frá.
Tað tekur tveir tímar bara at koma á opið hav. Tað byrjar so smátt at ganga upp fyri teimum, at hetta vist nokk ikki var eitt serliga gott hugskot.
– Tá aldurnar vóru upp á tað hægsta sóu vit ikki land. Bara risa stórar aldur, sigur Jákup og greið­ur frá sum situr hann aftur í bát­inum.
Tað er ikki hugsingur um at venda bátinum, tí fær hann eina aldu frá síðuni, so koppar hann. Tað eydnast at fáa sett kós móti landi aftur. Komnir á keiina standa hvalb­ingar og rista við hødvinum.
– Tá sjálvt hvalbingar spyrja hvat vit hugsa fyri okkum, so hevur tað verið nakað ringt veður, staðfestur Jákup á Borg, og sendir Julian Florescu ein tanka. Stakkalin kann ikki hava havt tað gott.
Hópurin steðgar í Suðri í nakrar dagar. Dagin eftir dystin fyllur John Petersen 30 ár. Í føðingardagsgávu hava nakrir á liðnum skipa fyri trimum stripparum. Tá John eina ferð tekur bindið fyri eyguni av fær hann sjokk, tí stripparnir eru ikki veru­ligur stripparar, men heldur spæl­arar hjá B36!

Ov nógv virðing á landsliðnum
Jákup á Borg er 18 ára gamal tá hann fær landsliðsboð fyrstu ferð. Hann er farin ein túr í SMS. Hans á Lag er til arbeiðis í Deres. Hann hevur um­vegis táverandi HB venjaran fingið at vita hvør er úttikin.
– Hann sigur so tillukku við lands­liðsúttøkuni, men eg trúgvi hon­um ikki. Tá fekst tú boðini um­vegis tíðindini í Útvarpinum, greið­ur Jákup frá.
Fyrsti dysturin er í Bosina, sum er nógv merkt av kríggi. Í upp­hit­ingini fer ljósið á leikvøllinum, og spenn­ingurin er spentur kring leik­vøllin.
Áskoðararnir byrja so at lýsa við lasarum. Føroysku spælararnir kenna seg ótryggar. Fyrst lýsa teir á Julian Johnsson, sum tvísporar inn í skiftirúmið. Síðani verður lýst eftir Una Arge, sum tveitur seg í vøll­in og roynir at goyma seg.
Jákup spælir 61 landsdystir og skorar tvey mál. Millum minn­ilig­astu dystirnar er 2-2 javnleikurin í móti Skotlandi á Svangaskarði, og dysturin í Hannover í 2002.
Tað hava eisini verið dystir, sum Jákup hevur bestan hug at gloyma. Ein teirra var á útivølli móti Skot­landi í 2006. Føroyska liðið er aftan­fyri 5-0 í hálvleikinum
– Hvørja ferð teir skoraðu, so fór ein sangur frá á leikvøllinum. Tá teir høvdu skorað nøkur mál, fangaði eg meg sjálvan í at murra við til lagið, sigur Jákup og grínur.
Jákup var í nógv ár yngstur á lands­liðnum, og tað innibar nakrar ótaknemmiligar uppgávur. Ein teirra var at standa í manngarð, með­an Óli Johannesen vandi frí­spørk.
– Eg veit ikki hvussu oftani Óli royndi seg, men hann rakti aldrin málið. Hann rakti bara okkum, sig­ur Jákup og tykist næstan fáa ilt bara at tosa um tað.
– Er tað nakað sum eg kundi hugsa mær at gjørt øðrvísi á lands­liðnum, so hevði tað verið at spælt við minni virðing fyri mótstøuni. Haldi mangan at eg hevði ov stóra virðing, og tí ikki trúði nóg mikið uppá meg sjálvan, sigur Jákup.
Lars Olsen og Jóannes Jakobsen høvdu Jákup í tonkunum eftir at hann var givin, men tað bleiv ongan­tíð til nakran landsdyst. So­statt er seinasti landsdysturin hjá Jákupi 2-1 sigurin á Litava á Svanga­skarði.
– Eg havi altíð vilja funnið hurð­ina á landsliðnum sjálvur, sigur Jákup, sum 33 ára gamal hevur spælt sín seinasta landsdyst.

Familjumaður
Gjøgnum alla samrøðuna nevnir Jákup fleiri ferðir familjuna. Hann er sera takksamur fyri stuðulin hann hevur fingið gjøgnum ár og dag frá teimum.
Tað er serliga ein hending í 2002, sum hevur merkt Jákup fyri lív­ið. Sum bara 32 ára gamal doyr stóri beiggin, Høgni á Borg. Hann er stóra fyrimyndin hjá Jákupi, um­framt at hann eisini er størsti viðhalds­mað­urin hjá Jákupi.
Undan hvørjum dysti fer Jákup ein túr á grøvuna hjá Høgna at heilsa uppá. Tað er ein fastur tátt­ur, sum fær Jákup at samla tank­ar­nar.
– Eisini tá eg hiti upp, so plagi eg at hugsa um hann. Hann var altíð fyrsti maður í Gundadali, so eg ímyndi mær, at hann hevði sitið har. Tá eg skori, so peiki eg altíð upp í loft. Tað er ein heilsan til Høgna, sig­ur Jákup.
Jákup hevði fleiri møguleikar at royna seg uttanlands, men tók ongan­tíð av.
– Er tað nakað, sum eg hevði gjørt øðrvísi í dag, so hevði eg nokk tik­ið av onkrum av tilboðunum, sum eg fekk úr eitt nú Íslandi. Eg hevði tað bara so gott í Føroyum, sig­ur Jákup.
Fleiri ferðir í samrøðuni kemur bland í minniligu dystirnar hjá Jákupi, og hann má ringja til vinir og kenn­ingar fyri at fá greiðu á akku­rát hvat hendi nær. Millum ann­að kom hann brádliga í tankar um, at hann faktist hevði spælt við eyka­liðnum hjá Liverpool móti sín­um elskaða Manchester United.
– Eg veit ikki hví eg minnist slík ting so illa. Tað má vera tí eg livi í fullari ferð, og ikki havi stundir at steðga á at hugsa um tingini, sigur Jákup. Hann vísur somuleiðis á, at hann má tveitast í kjallarin tá Man­chester United spælir, tí hann er so íðin.
– Tað er næstan ótrúligt, at eg ikki skal minnast at hava spælt móti eyka­liðnum hjá Manchester United, sigur Jákup víðari og ristur við høvd­inum.
Jákup minnist heldur ikki steypa­finalu sigurin í 2003, og má ringja til vinmannin Fróða Clementsen fyri at fáa greiðu á hvør mót­støð­an var – B36 vann 3-1 á GÍ, og Jákup skoraði eitt av málunum. Fróði fekk reytt kort.
Tað er hinvegin heldur ikki lætt at skula skilja millum næstan 500 dystir og 176 mál. Jákup hevur skot­ið 133 mál í bestu deildini. Tað eru 13 færri enn John Petersen, sum hev­ur núverandi metið.
– Mentalt eri eg klárur at spæla fleiri ár afturat, so um beinini vilja tað, so ætli eg mær at taka metið, sigur Jákup á Borg at enda.
Prince liggur og snorkar á sofuni. Kaffe er blivið kalt og ljósini í flestu av húsunum í Viljormsgøtu eru sløkt. Hóast yrkisleiðin hjá Jákupi ikki fevnir um so nógv skiftið, so hev­ur havnarmaðurin upplivað nógv.
Vil heilsan, so kann Jákup á Borg gerast tann leikarin, ið hevur spælt flest dystir og skotið flest mál í før­oyskum fótbólti.

- - -

FAKTA: Jákup á Borg

Føddur: 26. septembur 1979
Foreldur: Guðrun og Heini á Borg
Kona: Susi á Borg
Børn: Fríði 9 ár, Anna 4 ár
Starv: Stjóri og eigari av Bilrøkt

Yrkisleið:
1996-2003 B36
2004 OB
2004-2008 HB
2008- B36
Landsdystir 61/2