Eg haldi tað vera sera ótíðarhóskandi, at ein nevnd í einum fakfelag ikki skal sleppa at gera ein sáttmála sjálv, sigur Andreas Poulsen, ið er alt annað enn fegin um broytingina, sum gjørd var á seinasta aðalfundi í Tórshavnar Kommunala Starvs- og Tænastumannafelag. Tá varð samtykt, at ein sáttmáli skuldi leggjast fyri eini aðalfund, áðrenn hann kann koma í gildi.
Anedras Poulsen vísir á, at tað hesaferð serliga vóru dagrøktarmammurnar, sum vóru ónøgdar við sáttmálan. Tær gjørdust limir í felagnum í fjør - og eru 65 í tali og tískil sera sterkar.
Á fundinum møttu ikki fleiri enn 96 limir felagsins. Av teimum vóru tað 52, ið feldu sáttmálauppskotið. Hetta er ikki meira enn 20% av limum felagsins.
Andreas Poulsen sigur, at hetta fær ikki nevndina at leggja frá sær.
Hetta merkir, at limirnir ikki eru nøgdir við arbeiðið, vit hava gjørt. Men eg haldi ikki, at hetta er eitt misálit á nevndina sum so, sigur hann.
Men tá so eitt annað uppskot kemur á borðið, so skal eisini tað fyri ein aðalfund. Verður tað aftur felt, so eitur formaðurin í Tórshavnar Kommunala Starvs- og Tænastumannafelag ikki longur Andreas Poulsen, sigur hann, uttan at hann kann svara fyri hini í nevndini.
Men hevði tað ikki verið ein møguleiki at sent uppskotið til uratkvøðugreiðslu millum allar limirnar, fyri at fingið eina heildarmynd av, hvat limirnir halda?
Nei, tað haldi eg ikki. Tá vit hava limafund, so kunnu allir limir møta, og har siga sína hugsan. Koma teir ikki á fund, so kunnu teir heldur ikki hava nakað at siga okkum, heldur Andreas Poulsen, sum týðuliga er misnøgdur við, at neyðugt er at spyrja aðalfundin um sáttmálan.
Í ein um nútíðarsamfelag má man kunna lata nevndini sáttmálasamráðingar í hendi, heldur hann.
