Felagið, sum eigur øll feløgini í TF samtakinum, eitt nú Tryggingarfelagið Føroyar og 70 prosent av Eik Banka, eitur »Ognarfelag Tryggingartakaranna«. Og tey sum eiga hetta felagið eru øll tey, sum hava eina trygging hjá Tryggingarfelagnum Føroyar.
Men tað er bara ein lítil partur av veruligu eigarunum, sum hevur nakra ávirkan, tí mátin, sum umboðsráðið verður valt uppá, er soleiðis háttaður, at tú skalt biða um at fáa ein atkvøðuseðil fyri at sleppa at atkvøða.
Og tað gera teir allar flestu tryggingartakararnir ikki. Tí skeyt Andrass Skaalum, umboðsráðslimur, upp, at í staðin fyri verður gjørd ein skipan, har hvør tryggingartakari fær eina brævatkvøðu sendandi, sum hann so kann velja at nýta, ella lata vera.
Fyri at samtykkja viðtøkubroytingar skulu tríggir fjórðingar av teimum 23 umboðsráðslimunum atkvøða fyri. Tað gjørdu teir ikki fríggjadagin. Tá atkvøddu 14 fyri og níggju ímóti. Tað vantaðu soleiðis fýra atkvøður til tess at fáa broytingina framda.
Umboðsráðið valdi at halda fast við skipanina, har bert heilt fáir av eigarunum gera sína ávirkan galdandi.
