Kreml-ráðgevin, Yuri Ushakov, sigur, at amerikanska uppskotið um vápnahvíld í Ukraina í ein mánaða, sum Ukraina eisini tekur undir við, bara fer at geva ukrainsku herdeildunum eitt andarhol.
Amerikanski forsetin, Donald Trump, hevur sagt, at bólturin nú liggur hjá russum.
Í morgun visti almenna russiska tíðindastovan Tass at siga, at flogfarið við amerikanska miðeystursendimanninum, Steve Witkoff, var komið í russiskt loftrúm, og flogfarið lendi í Moskva um 10.30-tíðina lokala tíð.
Steve Witkoff er maðurin, sum hevur havt ein veksandi leiklut í friðarsamráðingunum millum Russland og Ukraina, og sambært russisku ávísini, Kommersant, skal amerikanski sendimaðurin hitta Vladimir Putin, men hesi tíðindi eru ikki váttað.
Fyrr í hesi vikuni gjørdist tað greitt, at Ukraina tekur undir við einari fyribils vápnahvíld í 30 dagar eftir samøður við umboð fyri USA í Saudi Arabia.
Sambært Reuters sigur Kreml-ráðgevin, Yuri Ushakov, í dag, at ein fyribils vápnahvíld millum Ukraina og USA bara verður eitt andarhol hjá ukrainska herinum, og hetta sigur hann í einari sjónvarpssamrøðu.
Í gár visti Reuters eisini at siga, at Russland hevur latið USA ein lista yvir "generel" krøv til friðarsamráðingar, men í dag vildi Kreml-talsmaðurin, Dmitrij Peskov, hvørki vátta ella avsanna hetta.
- Nú er tað upp til Russland. Vit hava fólk, sum fara til Russlands júst nú, segði amerikanski forsetin, seinnapartin í gjár.
##med2##
