Frí er ein skemtilig bók til ung sum eldri við íblástri til matgerð, lívsstíl, sjálvbjargni, skapandi lív og gleðina at vera á ferð. Hetta er ein bók um forvitni, útilív og frísinnaði menniskju, sum finna gleðina í tí einfalda og siðbundna – við hjarta, hondum og hugflogi.
Bókin, ið er skrivað sum skaldsøga, kann eisini brúkast sum ein kókibók, har lesarin finnur alskins uppskriftir. Tað er Jóna Joensen, ættað úr Syðrugøtu, búsitandi í Sveis, ið hevur skriva bókina Frí.
Íblásturin hevur hon frá uppvøkstrinum í Føroyum, ferðum kring knøttin og lívinum á garðinum í Sveis, sum hon, saman við manni sínum Thomas, hevur umskapað til eitt gistingarhús og eina sjálvbjargna oasu - við grønmeti, fruktum, urtum og víni.
Á garðinum finna trý ættarlið gleðina við at skapa alt frá grundini. Aftrat ból og bita, bjóðar Jóna coaching og leirskeið í Ryfflihaus. Frí er hennara fyrsta bók.
Bókaframløgur verða á Sands Bókasavni mikukvøldið 29. oktober klokkan 19 og í HNJ - Gamli Bókhandil - hósdagin 30. oktober klokkan 16.30.
Aðrar framløgur, sum verða av bókini, verða á Fiskastykkinum í Sandavági leygardagin 1. november klokkan 12, á Testovuni Marin Malena á Biskupsstøðgarði í Klaksvík sunnudagin 2. november klokkan 16, á Seglloftinum á Tvøroyri 3. november klokkan 16.30 - og í býráðshúsunum í Norðragøtu 5. november klokkan 19.
