Leygardagin fekk hann 100 nátungar, og í gjár fekk hann 325.
- Líkindini vóru einki serlig ein stóran part av degnum í gjár. Eg ætlaði mær norður um, men vendi aftur tvær ferðir.
Tað sigur toftamaðurin, Rúni í Hjøllum, sum var eftir nátungum í gjár - einsamallur í einum 24 fót báti við 200 HK motori.
- Leygardagin, tá eg fekk 100, fór eg norður gjøgnum Djúpini og eystur undir Enniberg. Leiðin heim aftur var eisini gjøgnum Djúpini.
Í gjár var hann eystan fyri, men málið var alla tíðina at sleppa norður um - norður undir Enniberg.
- Líkindini vóru einki serlig norðan fyri. Her var havalda, men seint seinnapartin slapp eg norður um.
Rúni í Hjøllum sigur, at tað var nógvur fuglur eystur úr Ennibergi, og her fekk hann meginpartin av veiðini.
##med2##
- Leiðin heim aftur var eystan fyri, og hetta gjørdist ein góður nátadagur, tá til stykkis kom.
Spurdur, um tað ikki var strævið at vera einsamallur á báti og taka so nógvan fugl, sigur hann.
- Nei, eg var so spentur, at eg kendi ikki møði. Í dag stendur so reingeringin fyri, og hetta er eitt ordiligt tak, sigur Rúni í Hjøllum.