- Hetta er ein stórur dagur. Nú krevur sex endiliga samtykki í lógarverkinum í Føroyum, og vit eru sera fegin um, at øll politiska skipanin stendur saman um hetta, siga Hervør Pálsdóttir og Ingilín D. Strøm.
Við samtykta uppskotinum verður farið frá eini áseting um neyðtøku, ið er grundað á harðskap og tvingsil til eina áseting, ið er grundað á samtykki.
Gamla ásetingin um neyðtøku var ikki tíðarhóskandi og fevndi ikki um støður, ið flest øll neyðtøkuoffur uppliva, t.e. toniskan immobilitet ella óviljað lammilsi.
Hetta er, tá kroppurin frystir, og viðkomandi ikki fær sett seg upp ímóti gerðini. Við eini áseting, ið er grundað á samtykki, fevnir ásetingin breiðari.
- Nú verður tað soleiðis, at um báðir partar ikki hava givið samtykki til sex, so er talan um neyðtøku. Hetta er eitt stórt stig og fer vónandi at hava eina hugburðsbroyting við sær, so vit fáa størri virðing fyri mørkum og frælsinum til at ráða yvir egnum kroppi, siga Hervør Pálsdóttir og Ingilín D. Strøm.
