Elias Ellefsen á Skipagøtu og liðfelagarnir Sävehof taptu greitt annan dystin í European League bólkaspælinum.
Sävehof spældi á útivølli í Kroatia móti Nexe. Nexe vann samanumtikið rættiliga greitt 39-31. Í steðginum var heimaliðið á odda 18-15. 31 skotin mál á útivølli er góðtikið, men tíverri fóru ov nógv mál inn hjá Sävehof í kvøld.
Í teimum evropeisku hondbóltskappingunum er ofta ræðuliga stórur munur á avrikunum á útivølli og á heimavølli, og betri dagar fara at koma hjá Sävehof aftur.
Elias skoraði í kvøld trý mál fyri Sävehof. Elias hevði sambært hagtølunum sjey royndir á málið hjá Nexe.
Toppskjútti hjá Sävehof gjørdist Rune Schrøder við 10 málum. Alexander Westby skoraði sjey mál fyri Sävehof.
Fríggjakvøldið klokkan 18 spælir Sävehof oddadyst í bestu svensku hondbóltsdeildini móti Ystad á útivølli. Ystad og Sävehof hava bæði 13 stig fyri átta dystir.
Næsti dysturin hjá Sävehof í European League verður móti franska liðnum, Aix á útivølli 16. november.
Í bólkinum hjá Sävehof vann týska liðið, Magdeburg í kvøld 31-27 (18-18) á Aix.
Í hesi løtu spæla hini bæði liðini í bólkinum La Rioja úr Spania og Gorenje úr Slovenia.
Nexe og Magdeburg hava fýra stig og Sävehof hevur tvey stig. Aix hevur einki stig, og undan dystinum í kvøld høvdu La Rioja og Gorenje einki stig.
Sävehof hevur átta dystir eftir at spæla í bólkaspælinum, harav fýra á heimavølli í Partille.
