Á hvørjum ári eru tvær steypakappinginar í estetiskum fimleiki, og í morgin og sunnudagin verður tann seinna av teimum. Hesa ferð verður kappast í ítróttarhøllini í Runavík.
Í morgin klokkan 14 verður farið í gongd, og fyrra dagin eru tað gentur, kvinnuunglingar og kvinnur, ið standa fyri tørni, og sunnudagin sleppa so pinkur og smágentur framat.
Hesar steypakappingarnar eru skipaðar soleiðis, at trý tey fremstu liðini í hvørjari deild fáa heiðursmerki, og besta liðið í báðum steypakappingunum í hvørjari deild fær steyp til ognar. Tá kappingarnar hesa ferð eru av, verður talt saman og á tann hátt verður funnið fram til samlaðu vinnararnar.
Feløgini, sum eru við í kappingini í Runavík um vikuskiftið, eru Støkk, Flog, Ljósið og Havnar Fimleikafelag, og væntast kunnu fleiri sera spennandi kappingar, tí nógv av liðunum eru sera jøvn, so einki kann sigast at vera avgjørt frammanundan.
Fyrra steypakappingin var á Kambsdali vikuskiftið 15. og 16. januar, og tá vann Havnar Fimleikafelag hjá kvinnum, kvinnuunglingum, gentum og smágentum, meðan Støkk vann hjá pinkum.
