Altjóða valeygleiðarar kritisera hvassliga tjóðartingsvalið í Georgia.
Tað kemur fram í felags yvirlýsing hjá valeygleiðarum úr felagsskapinum fyri trygd og samstarv í Evropa (OSCE), Evroparáðnum, ES-tinginum og NATO.
- Ójavni í mun til fíggjarliga tilfeingi, klívandi valstríðstemningur og seinastu lógarbroytingarnar hava elvt til stóra stúran í allari valgongdini, sigur franski valeygleiðarin, Pascal Allizard.
Hann stendur á odda fyri sendinevndini hjá OSCE í Georgia undir tjóðartingsvalinum í ár.
Í morgun kunngjørdi valnevndin í landinum stjórnarflokkin í Georgia, Georgian Dream, sum vinnara av valinum við 54 prosentum av atkvøðunum.
Tað hendi eftir at yvir 99 prosent av valdømunum vóru tald upp. Tað upplýsir valnevndin sambært tíðindastovuni Reuters.
Andstøðan í Georgia viðurkennir ikki úrslitið av tjóðartingsvalinum.
Sambært Tinu Bokuchava, sum stendur á odda fyri andstøðusamgonguni, er valið "stolið frá georgiska fólkinum". Tað sigur hon við BBC.
Andstøðusamgongan eitur Sameinda Tjóðskaparliga Rørslan.
Sambært Antonio López-Istúriz White, sum er leiðari fyri sendinevndins hjá Evropatinginum, eru "djúpar stúranir um demokratisku afturgongdina í Georgia".
- Vit fara framhaldandi at fylgja væl við støðuni í Georgia fyri at vita, um næsta stjórnin velur at laga seg til ES-virði og normar og venda neiligu gongdini seinastu mánaðirnar.
Í fráboðanini verður varpað ljós á, at fjølmiðlarnir í Georgia hava verið heftir í teirra frágreiðing um valið.
Harumframt leggja valeygleiðararnir dent á, at fjølmiðlarnir í landinum eru treytaðir av fígging frá politiskum aktørum.
Valeygleiðararnir hava eisini lagt til merkis, at fráboðanir hava verið um hóttan, tvingsil og trýst á veljarar - serliga á starvsfólk í almenna geiranum.
/Ritzau/
