»I ain’t gonna be just a face in the crowd
You’re gonna hear my voice
When I shout it out loud«
Tá hann stóð sum vinnari av X-factor, kundi teksturin hjá Bon Jovi neyvan verið meira beinrakin. Íslendingar høvdu so sanniliga hoyrt røddina hjá Jógvan Hansen. Og teimum dámdu tað, sum teir hoyrdu. Hann var ikki bara eitt andlit millum tey mongu í Reykjavík.
Men sjálvur var Jógvan púrasta tikin á bóli, tá hann at enda stóð sum vinnari av X-factor.
- Eg dugi slettis at greiða frá, hvat eg hugsaði, tá vinnarin varð kunngjørdur. Tað var púrasta óveruligt, var einasta viðmerkingin, sum hann fekk givið portalinum.
Tað vóru Hara-systrarnar, sum av fyrstan tíð høvdu teknað Jógvan til kappingina, og tí var tað kanska lagnunnar speiseimi, at júst tær vóru mótstøðan í finaluni, men Jógvan leggur dent á, at hann ongan tíð skilti hetta sum nakað negativt.
- Tær hava talst millum góðu vinfólkini hjá mær, mest sum síðani eg kom til Íslands. Og vit hildu tað bara vera stuttligt, at vit øll trý komu í finaluna. Hinvegin, so skuldi ein vinnari jú finnast, og so kundi eg tað sama fara eftir sigrinum. Ikki minst, tí eg nú í somikið nógvar vikur havi arbeitt fram ímóti hesum.
Hart arbeiði
Og tó at tað tykist stuttligt, tá løg verða sungin á pallinum. Og tó at tað fyri summi kann tykjast sum ein lættur vegur til stórt PR, so staðfestir Jógvan, at hetta avgjørt ikki er komið av ongum.
- Eg kann bara siga, at tað liggur nógv arbeiði aftan fyri. Heilt nógv. Til hvørt fríggjakvøld skulu nýggj løg venjast. Vit hava havt sanglærara, koreograf og stylist knýtt at okkum, og allir smálutir skulu fáast í rættlag, áðrenn fríggjakvøldið kemur. Tað krevur nógva og harða venjing, samstundis sum eg havi havt eina fyritøku at reka. Ikki tí. Hetta hevur verið ótrúliga stuttligt og ein stór uppliving. Men tað er einki loyndarmál, at eg eri havi verið troyttur seinastu vikurnar, sigur hann.
Fær navnið fram
Vinningurin hjá Jógvani var ein fløgusáttmáli, og nú verður farið í studio at syngja hesa inn. Talan verður um tað nógva um cover-løg, sum Jógvan hevur framført í kappingini. Og ivaleyst fara landaplágur úr hesari at gera um seg í bæði Íslandi og Føroyum.
Hinvegin er hetta ikki ein fløga, sum veruliga sýnir Jógvan sum tónleikara, men tað tykist ikki vera nakað, sum Jógvan sjálvur leggur so nógv í.
- Tað er rætt, at tað kanska ikki er »mín« tónleikur. Men hetta er ein fløga við »mínum« navni, og tað skal avgjørt ikki undirmetast. Verður hetta nýtt rætt, so kann tað veruliga flyta nøkur mørk fyri meg, og tað kann verða nógv vert. Og eg kann bara siga, at eg gleði meg nógv til komandi dagarnar, sigur Jógvan.
Íslendingar satsa
Tað tykist, sum royna íslendingar altíð at koma allan vegin, tá teir síggja ein møguleika. Kann hetta eisini vera galdandi fyri teg, nú navn títt kemur somikið væl fram.
- Vónandi. Íslendingar hava tann góða eginleikan, at teir altíð vilja røkka tí maksimala, og á tann hátt kanst tú siga, at eg verði trýstur fram.
- Í hesum býr eisini, at íslendingar veruliga loyva fólki at gera tað, sum tey eru best til. Í Føroyum eru ein rúgva av framúr góðum tónleikarum, men alt ov ofta eru somu tónleikarar ovbyrjaðir av øllum arbeiðinum, sum fylgir við tónleikinum. Skal eg taka meg sum dømi, so havi eg nú ein góðan manager, sum tekur sær av øllum praktiskum viðurskiftum, og sum eg eisini havi stórt álit á, tá tað ræður um at selja. Sjálvur skal eg »bara« hugsa um tónleikin, og tað gevur mær nakrar veldugar fyrimunir sammett við vanliga føroyska tónleikaran.
Umboðsmaður hjá Jógvani er Einar Bárðarson. Hann er búsitandi í London, og hann virkar her sum umboðsmaður fyri fleiri av størstu íslendsku tónleikanøvnunum.
