Flagstengurnar vóru líka langar!

Rolf Guttesen

Yvirskriftin var ”Kinesarar og russar áhuga fyri før­oysk­um fiski”. Hetta var jú ein góð yvirskrift, sum boðaði frá spennandi tíðindum. Men í greinini, sum fylgdi, stóð ikki eitt orð meira um, hvat ið russarar og kinesarar høvdu havt áhuga fyri. Teir blivu als ikki nevndir aftur. Tað átti man at kunna vænta, haldi eg. Men nei, hatta var ein tóm yvirskrift.

Ikki um fiskaproduktir, men flaggfokusering

Men annars hevur tíð­ind­a­ber­in verið vakin Tó eru tað ikki skøturavar, king prawns ella salmon tartare, sum hava áhuga. Nei, hann slær fast at: ”Føroyska merk­ið hev­ur eina serstøðu á fisk­i­vinn­u­fram­sýn­ing­ini í Brússel” (Brússel, við einum serføroyskum tví­ljóði –ú-, er helst koduorð fyri Bruxelles). Men aftur, hvat ið serstøðan ber í sær, fáa vit einki at vita um. Man kundi gitt, at ein serstøða hevði verið, um øll fløggini utt­an fyri høllina í ”Parc de Ex­pos­i­tion” vóru føroysk. Men nei, tað var heldur ikki soleiðsnar meint.

Flaggstengurnar vóru líka høgar, halleluja!

Vit fáa at vita at ”Merkið” var líka stórt sum ”Dannebrog”. Men er tað ein serstøða? Nei, stórtíðindini tykjast at vera, at allar flaggstengurnar utt­an fyri framsýningina í Bruxelles ”vóru líka høg­ar.” Fantastiskt. Gott at eyg­a­mál­ið var kalibrerað og í lagið, so at hesi stórtíðindir kundu ber­ast í bý. Flaggstengurnar á eini seafood-framsýning vóru líka høgar.

Tá tað er noterað og sent við ýlandi ferð til red­a­k­t­i­ó­n­ina, sýn­ist sum at alt, sum var innan­dura hevði minni ella ongan áhuga. Nú var ær­an reddað, so til tramans við laksi, goggum, sauce og skelj­um. Líkamikið er, hvør ið hevði vunn­ið heið­urs­merk­­ir fyri nýggj­ar og spenn­andi vør­ur. Nei, vit fáa einaferð enn at vita, at ”Merk­ið her er viðurkent og virt av vertunum.”

Føroyingar vunnu einki

Annars fór nógv spennandi fram hesar tríggjar dagarnar í Bruxelles. 38 produktir vóru komin í finaluna til at vinna ”Prix d’Elite”, sum verður givin í sjey ymiskum bólkum(legg til merkis, at teir ikki tosa um lond ella tjóð­ir her, tað snýr ser um fiskavørurnar) . Fýra fin­al­ist­ar vóru úr Denmark, sum heimasíðan sigur frá. Tvey av hesum produktum vóru frá Royal Greenland, trummerum tjum uhadada. Hava teir ikki virðing fyri, at Royal Greenland er úr Grøn­landi? Var grønlendska flagg­ið ikki vundið á stong, ið var líka høg sum tann før­oyska?

Sást tú Baskaraflaggið, ella blivu teir diskrimineraðir?

Vinnari av ”Seafood Prix d’El­ite” í bólkinum ”Best New Retail Product” bleiv virk­ið Angulas Anguinaga úr Spania. Teir halda til í einum býi sum eitur Irura. Hesin býur liggur í Bask­ar­a­landinum. Teir í Baskara­land­inum hava sítt egna reg­i­o­nala flagg, tí regiónirnar í Spania hava sjálvstýri. Hevði tíðindamaðurin hjá Sos­i­alinum ikki eyga fyri, um bask­ar­a­flaggið veitraði har, ”við­urkent og virt av vert­u­num.” Um tað ikki var har, og tað grønlendska heldur ikki, hava vertirnir so gjørt ein grimman mismun? Ella hvat?

Elitumerki?

Stutt og gott, føroyskir fram­leið­arar komu aftur ongul í reyv. Teir vóru hvørki skotn­ir upp ella enn minni vunnu teir nakað elitumerki. Frægari eydnu næstu ferð.

Men tíðindamaðurin hjá Sos­ialinum sá greitt, at flagg­stong­in við føroyska merk­i­num var minst líka so høg sum hinar. So hatta man hava verið ein frammúr fram­sýning.