Í dag verður av álvara farið undir aftur landskappingina í næstbestu deildini hjá monnum. Fyrsti dystur í 17. umfari var tó longu ólavsøkuaftan, tá ið B71 átti heimavøll á Tórsvølli ímóti AB. Tað vóru nógvar ferðir fleiri áskoðarar, enn tað plaga at vera, tá ið lið í næstbestu deildini spæla, og tað endaði 1-1.
Í summarfrítíðini hava broytingar verið í fleiri av hópunum. Í onkrum feløgum eru fleiri spælarar lagstir aftrat, og í øðrum feløgum eru fleiri spælarar fluttir frá.
HB, sum er aftast, fer í kvøld at spæla grannauppgerð á útivølli ímóti FC Hoyvík, sum er næstaftast. Í FC Hoyvík eru fýra ungir danskir spælarar lagstir aftrat. Hjá HB er tað greitt, at miðvallarin Magnus Holm Jacobsen verður á liðnum í dag, og onkrir veteranar, sum ikki hava spælt, eru farnir at venja og fara at hjálpa til fyri at sleppa undan niðurflyting.
KÍ fer at spæla á Vágseiði ímóti FC Suðuroy, sum er næstfremst. Tað er óvist, hvussu tað verður við KÍ liðnum, sum er seks stig omanfyri niðurflytingarstrikuna. Fleiri spælarar, sum hava verið í besta KÍ hópinum, og sum hava hjálpt til á næstbesta liðnum, eru í summarsteðginum leigaðir til onnur feløg.
Pól Thorsteinsson og hansara menn í FC Suðuroy hava ikki tapt seks tær seinastu ferðirnar. Úrtøkan í hesum dystunum er fýra sigrar og tveir javnleikir.
Grannauppgerð verður seinnapartin millum Víking og NSÍ. Víkingur hevur vunnið fýra tær seinastu ferðirnar og er á triðja plássi. Kappingini um plássini á besta liðnum er stór, og nú leikluturin í Europa er av á hesum sinni, fer tað ivaleyst at bera við sær, at næstbesta liðið verður væl mannað. Hjá NSÍ er Atli D. Petersen fluttur yvir á Skála at vera við í kappingini um pláss á besta liðnum.
B36, sum framvegis er topplið, fær tíðliga seinnapartin vitjan av TB, sum er á fimta plássi og framvegis stríðist fyri at vinna uppflyting. Tvær tær síðstu ferðirnar undan summarsteðginum tapti B36 – 3-2 á útivølli ímóti FC Suðuroy og 3-1 á heimavølli ímóti B71.
Tá ið B36 4. mai hevði vitjan av TB, var úrslitið 2-2, eftir at heimaliðið var frammanfyri 2-0, tá ið tað restaðu 20 minuttir.
Víkingur – NSÍ: Áki Leitisstein Hansen kl. 16.00
FC Hoyvík – HB: Høgni Madsen kl. 18.00
B36 – TB: Árni Brandsson Petersen kl. 13.00
FC Suðuroy – KÍ: Jákup Øssursson Mohr kl. 13.00
Ólavsøkuaftan
B71 – AB 1-1 (0-1)
0-1: Bartal S. Petersen 11.
1-1: Tijani Yakubu br 80.
