Koronakreppan rakar ferðavinnuna sera hart. Og nú eru tær fyrstu uppsagnirnar komnar.
Ferðavinnufyritøkan 62 N hevur í dag sagt øllum starvsfólkunum úr starvi. Talan er um 37 starvsfólk.
Tað er nevndin í felagnum, sum hevur tikið avgerð um at siga øllum starvsfólkunum upp. Tað er gjørt, nú tað sær sera dapurt út viðvíkjandi at ferðafólk koma til landið í summar.
– Støðan er álvarsom, og pengarnir fossa úr kassanum í løtuni, sigur Bergur Thomsen, stjóri, við útvarpið hjá Kringvarpinum.
– Sum tað sær út nú vera ongar inntøkur í ferðavinnuni í summar. Nær triði hjálparpakkin kemur, er óvist, og nú ber ikki til at bíða longur, sigur stjórin í 62 N við Kringvarpið.
Flestu av starvsfólkunum í 62 N vórðu farin í koronaskipanina hjá ALS. Virksemið heldur tó fram í uppsagnartíðini.
Nøkur og 20 uppsøgd hjá Gist og Vist
Gist og Vist hevur eisini sagt nógvum av starvsfólkunum upp.
– Vit hava sagt nøkur og 20 fólkum úr starvi. Harumframt eru fleiri tímalønt, sum vit ikki hava tørv á longur, segði Johannes Jensen, stjóri í Gist og Vist við Kringvarpið í gjárkvøldið.
Hotel Tórshavn, Hotel Vágar og fleiri matstovur í Havn steingja. Hotelvirksemið verður tó á Hotel Føroyum.
Fleiri av matstovunum hjá Gist og Vist steingja eisini.
Flestu av starvsfólkunum hjá Gist og Vist vóru annars farin í koronaskipanina hjá ALS.
– Í februar høvdu við 323 fólk á lønarlistanum, men í mars vóru bara 20. Ferðavinnan í ár er farin fyri bakka. Vit vóru noydd til tað gera hetta, sigur Johannes Jensen.
