Tað er framvegis púra óveruligt, og tað er framvegis ein veruleiki. Føroyar halda fram at avrika væl millum heimsins bestu hondbóltstjóðir í EM endapælinum fyri U-20 landslið hjá monnum, sum í hesum døgum er í Porto í Portugal.
Í dag var Noreg mótstøðuliðið í fyrra dystinum í B-bólkinum. Í hondbólti er Noreg ikki hvør sum helst. Føroyar vunnu 33 – 31 eftir hálvleiksstøðuna 16 – 16. Sigurin ber við sær, at Føroyar framvegis hava møguleika at enda millum 10 tey bestu í kappingini. Tað er týdningarmikið, tí tað ber rættin at vera við í HM endaspælinum næsta ár við sær.
Á middegi í morgin er Pólland mótstøðuliðið. Um tað eydnast at vinna ímóti Póllandi, so verður atgongumerkið til HM kappingina tryggjað. Fyrr í kappingini hevur Pólland vunnið 32 – 26 ímóti Noregi.
Heilt stóri spælarin á føroyska liðnum í dag var Elias Ellefsen á Skipagøtu. Hann var toppskjútti við 12 málum, og hann átti uppspælið til fleiri av hinum málunum. Avrikið var heilt merkisvert, tí okkara stjørnuspælari er framvegis darvaður av skaða í knænum og megnar tískil ikki at bróta ígjøgnum á sama hátt, sum hann plagar at gera.
Føroyska liðið var fyri tað mesta avgjørt í verjustøðu, og mótstøðumenninir nýttu oftast nógva orku at fáa mál. Eisini tí Pauli Jacobsen var so stinnur millum stólparnar.
Beinanvegin eftir steðgin løgdu Føroyar seg á odda við trimum málum. Norski venjarin bað um timeout, men eftir stutta steðgin øktu Føroyar munin til fýra mál, og leingi var munurin 3-4 má og einaferð var hann seks mál. Síðstu tíggju minuttirnar minkaðu norðmenninir um munin, so hann var 2-3 mál, og tá kendist tað sum um, at teir høvdu vón um at venda gongdini.
Føroysku spælararnir, sum nú hava nógvar royndir í sovornum dystum, heildu høvdið kalt, Pauli Jacobsen bjargaði fleiri ferðir, og so endaði tað við 33 – 31 sigri ímóti Noregi.
Ungu føroysku hondbóltsspælararnir hava av álvara skrivað Føroyar á altjóða hondbóltskortið.
Noreg – Føroyar 31 – 33 (16 – 16)
Elias Ellefsen á Skipagøtu 12
Hákun West av Teigum 5
Sveinur Olafsson 3
Pauli Mittún 3
Rói Ellefsen á Skipagøtu 2
Janus Dam Djurhuus 2
Óli Mittún 2
Viktor Gaini 2
Baldur Gillason 2
Bjarni í Selvindi
Bogi Hansen
Kristoffur Bjørgvin
Sakir Tróndarson Frýdal
Ovi Lützen
-
Málverjar
Pauli Jacobsen 15/42 35,71%
Alexandar Lacok
-
Venjarar
Julian Johansen og Mark Lausen Jarcher
Aðrir á beinkinum
Jens á Skipagøtu og Ári Jógvansson Olsen
