Kubanski forsetin, Miguel Diaz-Canel, ávarar um, at USA fer at møta stórari mótstøðu, um tey royna at yvirtaka oyggjaríkið.
Hetta hendir í einum uppslagi á sosiala miðlinum X.
– Íringasta føri hevur Kuba eina trygd: Ein og hvør ágangsmaður uttanífrá fær óbrotliga mótstøðu, skrivar forsetin.
Hann greiðir ikki nærri frá, hvørjum slík mótstøða verður samansett av.
Kubanska stjórnin er undir stórum trýsti frá USA. Amerikanska stjórnin hevur millum annað sett blokadu í verk móti venezuelansku oljuveitingunum til Kuba.
Samstundis hevur amerikanski forsetin, Donald Trump, sagt, at hann heldur, at hann fær "heiðurin at taka Kuba", og at hann gjarna vil síggja eina skipanarbroyting á Kuba.
Kommunistisku myndugleikarnir á Kuba hava verið á mótsettu megin USA í sjey áratíggju. Fátæka oyggjatjóðin hevur tætt tilknýti til Russland.
Sambært tíðindastovuni AFP segði amerikanski uttanríkisráðharrin, Marco Rubio, týsdagin, at ein avgerð hjá Kuba um at loyva kubanskum útlegdum at gera íløgur og eiga fyritøkur ikki er nóg mikið í eygunum á USA.
Tað verður tí ikki nóg mikið til at gera tær nýskipanir møguligar, sum Trump-stjórnin krevur av Kuba.
– Tað fer ikki at loysa tað. So tey hava nakrar stórar avgerðir at taka, sigur Rubio, sum er kubansk-amerikanari, við tíðindafólk í Hvítu Húsunum.
Kuba er opið fyri breiðum samráðingum við Washington og fyri at loyva fleiri íløgum - men landið fer ikki at umrøða broytingar í síni politisku skipan, sigur Tanieris Dieguez, varasendiharri hjá Kuba í Washington D.C., við AFP.
Londini bæði "hava nógv at leggja á borðið", segði hon.
Men hvørgin skal biðja hin um at broyta sína stjórn, segði hon.
– Einki, sum viðvíkur okkara politisku skipan, einki, sum hevur við okkara politiska modell, okkara ríkisrættarliga modell at gera, er partur av samráðingunum, og tað verður tað ongantíð, sigur hon.
– Tað einasta, sum Kuba biður um í einari og hvørjari samrøðu, er virðing fyri okkara fullveldi og okkara sjálvsavgerðarrætti.
The New York Times, sum vísir á dulnevndar amerikanskar embætismenn, hevur skrivað, at Trump-stjórnin hevur heitt á Kuba um at koyra Miguel Díaz-Canel úr starvi, sum verður mettur trekur at broyta.
Marco Rubio hevur tó afturvíst fráboðanini.
Á X skrivar hann, at greinin er løgin og eitt dømi um eina søgu, sum er grundað á keldur, sum eru "svikarar og lygnarar, sum siga seg kenna sannleikan".
/Ritzau/AFP
