8-mannafarið hjá kvívíkingum er stórfavorittur at vinna FM fyri sjeyndu ferð. Leygardagin vann Kvívíkingur fyri triðju ferð í ár, og hóast tað ikki er eingin kapping um fremsta plássið, so er í løtuni ilt at ímynda sær annan FM vinnara enn Kvívíking.
Á málinum var eingin ivi. Kvívíkingur var klárt fremstur – eina bátslongd frammanfyri kappingarneytarnar. Men leingi var tað rættuliga spennandi. Fríggjarin úr Miðvági var bragdligur í startinum, og hann var leingi á odda. Eina løtu togaðust teir báðir – Fríggjarin og Kvívíkingur – men enn eina ferð var Kvívíkingur drúgvastur.
Tá ið teir næstu fóru um málið, var tað rættuliga tætt. Frá Fríggjaranum, sum var nummar tvey, og aftur til Árnfirðing, sum var nummar fýra, var bara ein stórur skutur.
Hóast teir ikki vunnu hesa ferð, so eiga miðvingar framvegis bestu vinnaratíðina á Eystanstevnu. Tað var í 1982, at Miðvingur vann í tíðini 6.40.49. Tíðin hjá Kvívíkingi hesa ferð var 0.12.12 lakari enn tann hjá miðvingum fyri 28 árum síðani. Hetta var næstbesta vinnaratíðin nakrantíð á Eystanstevnu.
1 Kvívíkingur 06:53.00
2 Fríggjarin 06:56.07
3 Argjabáturin 06:56.18
4 Árnfirðingur 06:57.16
5 Ørvur 07:10.24
6 Knørrur 07:14.15
Støðan
1 Kvívíkingur 21
2 Argjabáturin 17
3 Fríggjarin 15
4 Árnfirðingur 13
5 Ørvur 8
6 Knørrur 7
