William Barr, sum var løgmálaráðharri hjá Donald trump, verjir í dag ákærarnar, sum hava reist 37 ákærur ímóti Donlad Trump fyri millum annað brot á lógina um njósning við at hava fleiri hundrað loyniligstemplað skjøl.
Við Fox News sigur Barr, at um bara helvtin kann prógvast í rættinum, »so er hann liðugur«.
Av teim 37 ákærunum, sum serligi ákærin, Jack Smith, hevur reist, snúgva 31 teirra seg um topploynilig skjøl, sum Trump tók við sær, tá hann í januar í 2021 fór úr Hvítu Húsunum eftir at hava tapt forsetavalið til demokratin Joe Biden.
– Eg var skelkaður av, hvussu følsom hesi skjølini eru, og hvussu mong tey vóru, sigur Barr.
– Og eg haldi um ákærupunktini, sum snúgva seg um lógina um njósnin – at hann tilvitað hevur havt hesi skjølini – at tað eru sterkar orsøkir.
– Um bara helmingurin av teimum eru sonn, so er hann liðugur, sigur hann.
– Tað eru nógvir smálutir í ákæruritinum, og tað er nógv, sera nógv, sum er fellandi.
Barr var løgmálaráðharri hjá Trump frá februar í 2019 til desember í 2020.
Hann sigur eisini, at tað er »láturligt«, at Trump sigur hetta vera eina heksajagstran, sum er gongd ímóti sær.
Tað vekir ans, sum Barr sigur. Og hann sigur hetta, nú flestu oddafólkini í Republikanska flokkinum hava valt ikki at finnast at Trump, eftir at ákæruritið varð almannakunngjørt fríggjadagin.
Hinvegin hava tey lagt løgmálaráðið og Biden undir at hava reist ákærurnar, sum eru politiskt motiveraðar.
Trump er í øllum veljarakanningum greiður favorittur at gerast forsetavalevni fyri Republikanarar á forsetavalinum næsta ár.
Hann skal týsdagin møta í einum samveldisdómstóli í Miami í heimstaði sínum Florida.
Har verður hann formliga kunnaður um ákærurnar. Umframt at taka topploynilig skjøl er hann eisini skuldsettur fyri at forða rættinum at arbeiða, fyri at koma við følskum pástandum, samansvørjing og fyri at halda loyniligt.
Hann royndi, farmgongur eisini, ferð eftir ferð at lúgva um, at hann hevði goymt nógvar kassar við loyniligum skjølum í heimi sínum í Mar-a-Largo. Samveldisløgreglan FBI valdi at enda at gera eina ófráboðaða húsarannsókn. Tá funnu tey skølini, sum Trump sambært Barr klokkuklárt ongan rætt hevði at hava varðveitslu.
Millum topployniligu skjølini skulu vera nógv týðandi skjøl um amerikanska uttanríkispolitikk og verju.
Merrick Garland, løgmálaráðharri, tilnevndi í november í fjør Jack Smith sum serligan ákæra – á enskum »special counsel« – til at taka sær av tveimum málum: Um leiklutin hjá Trump og viðhaldsfólki hansara, sum lupu á Kongressina 6. januar í 2021. Og um leiklutin hjá Trump við stjórnarskjølnum, hann tók við sær, tá hann fór frá sum forseti.
/ritzau/
