- Jú, Starvsmannafelagið hevur fingið nógv. Fyrstu samráðingarnar eru altíð leiðbeinandi og tískil er lættari fyri tey, ið koma aftaná. men sáttmálin er uppá 2 ár og 7 mánaðir, so felagið verður ikki fyrst at samráðast næstuferð, sigur Karl Johansen, formaður í Havnar Arbeiðsmannafelag.
Hann vil tó ikki siga, hvat hansara felag metir vera nøktandi og ringt er at gera øll nøgd, metir hann.
Luksus
- Vit hava nú fingið tað, ið kallast spesialarbeiðaraløn. Nú er veruleikin jú tann, at øll eru spesialarbeiðarar, tí ein skal duga okkurt, tá ein er á arbeiðsmarknaðinum í dag, sigur Karl Johansen.
Hann sigur, at hjá teimum er tað nú einaferð so, at talan er um tímaløn og at lønin liggur fremst. Hann hevur ikki verið í samband við onnur feløg, og veit tí ikki, um nakrar ætlanir eru um nøkur av somu nýhugsanum, sum Starvsmannafelagið hevur í sínum sáttmála.
- Lønin liggur fremst, hitt er luksus, sigur Karl Johansen í stuttari viðmerking.
