Hóskvøldið spældu fótbóltslandsliðini hjá Gibraltar og Wales venjingardyst í Algarve í Portugal.
Undan dystinum hevði Gibraltar tapt 13 dystir á rað við málúrtøkuni 0-50. Tað er serliga 0-14 tapið fyri Fraklandi í EM-undankappingardysti í Nice 18. november í fjør, sum skemmir málmunin hjá Gibraltar.
Men hesaferð framdu leikararnir hjá Gibraltar eitt ótrúligt bragd við einum 0-0 javnleiki móti Wales.
Wales var risastórur favorittur, men walisar megnaðu ikki at skora móti Gibraltar, ið fagnaði úrslitinum sum ein stóran sigur.
Niðurlond vunnu í venjingardysti á heimavølli á De Kuip leikvøllinum stórsigur 4-0 á Kanada. Øll málini vóru skotin í seinna hálvleiki.
Úrslit frá venjingardystum leiktir hóskvøldið:
Niðurlond-Kanada 4-0 (0-0)
1-0 Memphis Depay ('50 )
2-0 Jeremie Frimpong ('57 )
3-0 Wout Weghorst ('63 )
4-0 Virgil van Dijk ('83 )
Gibraltar-Wales 0-0
