Ingolf S. Olsen
Aksel V. Johannesen, formaður og vinnupolitiskur framsøgumaður hjá Javnaðarflokkinum, hevur ikki enn sæð uppskotið hjá Johan Dahl, vinnumálaráðharra, um at umskipa almenna Ferðaráðið, Visit Faroe Islands, til eitt alment partafelag, og tí hevur hann ikki hug at fara í smálutir.
- Men í útgangsstøðinum eri eg ikki negativur, tí hyggja vit at søguni, so er onki at ivast í, at Visit Faroe Islands hevði fingið tað betri, um tað var eina armslongd frá politisku skipanini, sigur Aksel V. Johannesen.
Men heldur ikki hann ætlar bara at leggja seg skerflatan, tá lógaruppskotið kemur í Løgtingið, men vil hava allar ivaspurningar væl og virðiliga viðgjørdar.
Annað endamál
- Í prinsippinum skal eitt partafelag hava sum endamál at vinna pening, men her er helst talan um eitt non-profit felag. Tí má tað fáa eina viðgerð, um tað er rætt at skipa hetta sum eitt partafelag, eisini í mun til partafelagslógina. Eg veit tó væl, at líknandi konstruksjónir eru gjørdar í nógvum øðrum londum, sigur javnaðarformaðurin.
Eisini hann er varin, tá tað snýr seg um avmarkaðu atgongdina til innlit, sum ein partafelagskonstruksjón hevur við sær, og broytt starvsfólkaviðurskifti.
- Vit sóðu tað millum annað við Posta, har starvsfólkið knappliga ikki hevði somu rættindi, sum áðrenn stovnurin varð umskipaður til alment partafelag. Slík viðurskifti skulu sjálvsagt takast við í orðaskiftið, sigur Aksel V. Johannesen.
