Grikski forsætisráðharrin, George Papandreou, boðaði í morgun frá, at grikska stjórnin, Evropasamveldið og Altjóða Gjaldoyragrunnurin IMF eru samd um tiltøkini, sum skulu forða fyri, at Grikkaland fer á húsagang.
Forsætisráðharrin boðaði frá semjuni aftan á ein kreppufund hjá stjórnini í morgun. Hann legði afturat, at grikska tjóðin noyðist at taka tung tøk fyri at forða fyri, at samfelagið steðgar upp.
Sambært tíðindastovunum hava ES og IMF játtað at læna Grikkalandi 159 milliardir dollarar. Seinni í dag hittast fíggjarmálaráðharrarnir í ES-londunum at staðfesta avtaluna við Grikkaland og IMF.
