Klokkan 15.00 seinnapartin fara 10 av teimum aldargómlu grindabátunum úr Vági, sluppin Johanna TG 326 og deksbáturin Nólsoyar Páll og aðrir bátar av Vági við kós móti Havnini. Í dag verður siglt (róð og siglt við seglum) av Vági til Skálavíkar, har steðgað verður á fyri náttina. Eftir døgurða í morgin leygardagin, tá streymviðurskiftini eru best, verður farið av Skálavík og róð/siglt norður til Havnar. Grindabátarnir við fylgi verða væntandi á Havnini umleið kl. 19.00 leygardagin. Við á ferðini eru 100-120 mans í øllum aldursbólkum.
Á ferðini til Havnar verður sum skilst væl tikið ímóti okkum í Skálavík, har vit fara at liggja nátt. Í Vágsbotni í Havn verður eisini skipað fyri móttøku, har Heðin Mortensen, borgarstjóri, og Jákup Símun Simonsen, formaður í Havnanevndini saman við býráðslimum vegna Tórshavnar Kommunu taka ímóti.
Í Vági eru vit í teirri hepnu støðu, at tað hevur eydnast at varðveita teir flestu av gomlu grindabátunum, teir flestu eru 8 og 10 mannafør. Grindabátarnir verða brúktir tann dag í dag og hendan ferðin til Havnar verður gjørd sum ein søgulig ferð, har ferðast verður til miðstaðarøkið á sama hátt, sum fyri fleiri enn 100 árum síðani. Ferðin verður hartil gjørd sum ein heiðran av Tórshavnar Kommunu á 100 ára føðingardegnum.
Tíðarætlan fyri ferðina
Fríggjadagin 24. juli
Kl. 15.00 Fráferð úr Vági
Út á kvøldið: Koma til Skálavíkar. Móttøka í Skálavík.
Leygardagin 25. juli
Umleið kl. 15.00 Fráferð úr Skálavík
Koma til Havnar umleið kl. 19.00. Móttøka í Havn.
