Tað fylgir stór ábyrgd við størvunum sum navigatørur umborð á teimum stóru grønlendsku trolarunum, men harafturímóti eru hýrurnar góðar.
- Ein stýrimaður ella skipari umborð á teimum stóru trolarunum tjenar einar 2-3 miljónir krónur um árið. Umborð á teimum smærru skipunum liggur hýran millum eina hálva og eina miljón krónur, skrivar Sermitsiaq.
Men, hóast hesar góðu hýrur, stendur framvegis á at útvega grønlendskar navigatørar, tó at tað gongur framá við maritimu útbúgvingunum.
- Talið av næmingum í ár er økt. Tað gongur betur, men tað gongur ikki nóg væl, sigur fyristøðumaðurin á Imarsiornermik Ilinniarfik, sum er grønlendski navigatiónsskúlin í Paamiut.
Skúlin lá áður í Nuuk, men varð fluttur til Paamiut í 1996. Skúlin bjóðar útbúgvingar innan farmaskipavinnu og fiskivinnu, og útbúgvingarnar eru góðkendar av danska Sjóferðslustýrinum.
- Reiðararnir vilja fegnir hava fleir skipsyvirmenn. Dreymurin er at fáa fleiri næmingar og menna skúlan.
Fyristøðumaðurin, Bent Olesen, vísir á, at Føroyar hava eitt sera stórt tal av navigatørum - í minsta lagi tíggju ferðir so nógvar sum Grønland.
- Tað hevði verið gott fyri okkara samfelag, um vit høvdu fleiri, og at okkara navigatørar - eins og teir føroysku - eisini komu út í heimin at starvast, leggur Bent Olesen aftrat í samrøðu við Sermitsiaq.
