Vegna serligar umstøður er countrykongur Føroya, Hallur Joensen, fluttur til lítla býin Lemvig í Norðurjútlandi at búseta seg í eitt ár.
Og mangt er sum bendir á, at hann fær úr at gera nú hann er vorðin flatlendisbúgvi. Neyvan fer ein dagur fram við uttan so, at sangir hansara verða spældir í sendingini »Peters verden« á P5 hjá Danmarks Radio.
Samstundis eru boð eftir honum úr øllum krókum Danmarkar. Størri og smærri countryklubbar, lokalradio og -sjónvørp, linedaceklubbar og onnur standa í bíðirøð eftir at fáa henda mikla føroyska sangaran og tónleikaran at vísa síni kynstur.
Teimum, ið dáma væl live-sendingarnar hjá TV Charlie, sum t.d. »Musik i Mariehaven«, kunnu gleða seg, tí har fer Hallur Joensen saman við bólki sínum T. Rooster Band og Sigrið Rasmussen javnan at syngja og spæla.
