Gongst sum ætlað, verður ein heldur sermerkt ráðstevna í Føroyum næsta ár. Tað er ein ráðstevna, har endamálið er at varpa ljós á hval og kóp sum matvøra.
Felagsskapurin sum hevur við hval og kóp í Norðuratlantshavi at gera, Nammco, hevur havt ársfund og har skutu umboðini fyri Føroyar upp at hava eina ráðstevnu næsta ár við tí endamáli at varpa ljós á hval og kóp sum matvøra.
Kate Sanderson úr Uttanríkis- og mentamálaráðnum, hevur verið forkvinna í Nammco síðani í 2019, men eftir ársfundin nú, tekur Noreg við formansskapinum. Bjarni Mikkelsen á Havstovuni, er formaður í vísindanevndini hjá Nammco og tað er hann til 2022.
Á ársfundinum hesa ferð var tað eitt uppskot úr Føroyum at skipa fyri eini altjóða ráðstevnu næsta ár um hval og kóp sum burðardygg matvøra. Ætlanin er ráðstevnan skal vera í Føroyum og í tíðindaskrivi frá fundinum, verður uppslýst, at uppskotið var samtykt.
Føroyar, Ísland, Noreg og Grønland eru limir í Nammco, og Kate Sanderson sigur, at limalondini tóku væl ímóti uppskotinum. Japan, sum var við á ársfundinum sum eygleiðari, boðaði frá, at eisini tey høvdu áhuga at vera við á ráðstevnuni.
Eisini USA, Kanada,Russland og Danmark vóru við á fundinum sum eygleiðarar.
Ætlanin við ráðstevnuni er at varpa ljós á búskaparliga og mentanarliga týdningin av hvalaveiðu og kópaveiðu, og at varpa ljós á, føðsluvirðið í tvøsti og spiki.
Á ráðstevnuni fara kokkar úr londum, sum veiða hval og kóp, at vísa síni kynstur og at vísa, hvussu hvalur og kópur verður etin í teimum ymsu londunum, og teir fara samstundis eisini at viðgera, hvussu hvalur og kópur kunnu brúkast í nútíðar matarlist.
