Tá Betri deildin hjá monnum byrjar aftur 9. mai verður HB uttan liðskiparan, Jógvan Róa Davidsen. Høgri bakkurin hevur brotið trý rivjabein í venjingardystinum móti TB á Tórsvølli leygardagin. Hann var ikki meir enn komin á vøllin, tá hann mátti av vøllinum aftur.
Úr HB verður sagt, at Jógvan Rói Davidsen ikki verður tøkur í millum fýra til seks vikur. Tí kemur hann at sita uttanfyri nakrar av fyrstu dystunum. HB hevur í ár fingið tilgongd av Hera H. Mohr, sum hevur verið á Argjum í eitt ár. Hann kemur væntandi at spæla á høgra bakki fyrstu dystirnar.
HB hevur trý tey fyrstu umførini dystir móti botn-fimm frá farna kappingarári. Tað eru EB/Streymur, ÍF og AB. Síðan skal HB spæla móti Víkingi og B36. Um Jógavn Rói Davidsen er úti í allar seks vikurnar, so er hann ikki tøkur aftur fyrr enn 7. juni móti TB á heimavølli.
##med2##
Tað er longu greitt, at Teit Jacobsen verður úti til eina ferð í heyst, eftir at hava verið undir skurð. Hartil eru ógreitt nær Jákup L. Thomsen verður tøkur, eftir at hann í vetur kom til felagið. Hørður Askham og Tróndur Jensen eru langtíðarskaddir.
