Meistaralagið ljómar í hátalarunum á Tórsvølli, og HB áskoðararnir eru væl upplagdir, tí tað eru teirra hetjur, sum í kvøld hava tryggjað sær løgmanssteypið.
Heilt avgerandi var tað, tá ið Teitur Matras Gestsson, sum er tiltikin í ein ímóti einum støðum og serliga brotsspørkum, tveitti seg til høgru fyri seg sjálvan og bjargaði, tá ið B68 miðvallarin Sebastian Lau Nielsen royndi seg. Teitur bjargaði, og tá ið allir hinir spælararnir skoraðu, so var tað greitt, at HB er steypavinnari fyri 29. ferð.
Aksel V. Johannesen hevur nú handað Teiti Matras Gestsson løgmanssteypið. Fasittið hjá HB fyri árið er bronsa í landskappingini og gull í steypakappingini.
Hóast tað ikki eydnaðist fyri fyrstu ferð at vinna steypafinalu, so sigur B68 venjarin seg vera stoltan av sínum monnum.
-Okkara áskoðarar vóru fantastiskir, og eg vildi ynskt, at teir fingu steypið við sær inn á Toftir. Eg eri rørdur av mínum monnum. Teir vóru ikki góðir fyrstu løtuna, men sum dysturin leið og serliga í longdu leiktíðini gravaðu teir tað besta fram í hvørjum einstøkum. Teir roknaðu við møguleikanum, og tað vóru HB spælararnir ikki sørt skelkaðir av, og eg iðri meg so inniliga um, at tað ikki eydnaðist at skora avgerandi málið í longdu leiktíðini. Vit ynskja Jákupi Martin Joensen og HB til lukku við steypinum og staðfesta, at avrikið í kvøld gevur okkum áræði at halda fram og at standa okkum betur næsta ár, enn vit hava gjørt í ár, sigur sinnisrørdi B68 venjarin Jákup á Borg í samrøðu við Televarpið.
