Fyri fyrstu ferð síðani 2012 stillar Miðflokkurin upp til býráðsval í Tórshavnar kommunu.
Floksformaðurin sjálvur, Jenis av Rana stillar upp, og saman við honum sjey onnur fólk:
1. Anna Margretha Otthamar, toymisleiðari
2. Jens Knudsen, tónleikalærari
3. Jenis av Rana, lækni
4. Kári Arge Kamminga, arbeiðsmaður
5. Matilda Sivertsen, kosmetolog
6. Nikkel Heinesen, námsfrøðingur
7. Rani A. Skaalum, lærari
8. Vilhelm Hendrik í Skálanum, sølumaður
Umframt Jenis av Rana, so hava onnur eisini stillað upp áður.
Anna Margretha Otthamar stillaði upp til býráðsvalið í 2016 einsamøll á uttanflokkalista. Hon fekk tá 46 atkvøður.
Jens Knudsen stillaði upp fyri Sambandsflokkin í 2016 og fekk 15 atkvøður og í 2020 fyri Sambandsflokkin og fekk 19 atkvøður.
Rani Andrasson Skaalum stillaði upp til býráðsvalið í Havn seinast og fekk 40 atkvøður.
Vilhelm Hendrik í Skálanum hevur áður stillað upp til løgtingsval fyri Miðflokkin, í 2015, og fekk hann tá 61 persónligar atkvøður.
Um stevnuna fyri býráðsvalið í Havn skrivar Miðflokkurin soleiðis:
Mál og lyfti Miðfloksins til Býráðsvalið 2024!
Virðing og kærleiki til einstaka menniskjað má setast framum asfalt, betong, skrivstovuveldi og egin áhugamál!
Veik, óhjálpin, heimleys, sjúk og fátøk verða raðfest og tryggjað, so ongin dettur niðurímillum Hjartað verður sett fremst í samskiftinum við borgaran. Kommuna er fyri ØLL og má rúma ØLLUM!
Ein beinleiðis linja verður sett á stovn, sum tryggjar, at borgarin fær fatur á kommununi og verður hoyrdur- og vegleiddur í ivamálum.
Kommunan tryggjar ókeypis sálarfrøðihjálp til borgarar sínar undir 15 ár, sum ikki fáa hesa goldna av skipan landsins.
Kommunan tryggjar, at ongi ung ella børn verða send av landinum í fremmand lond og umhvørvi vegna aðrar enn lívshóttandi orsøkir!
Kommunan virkar við í yvirtøkuni av Norðurlandahúsinum á føroyskar hendur, útbygging av hesum til Tjóðleikhús og bygging av Parkeringshøll undir tí nýbygda.
Barnafrádrátturin hækkar eyka fyri hvørt barnið, fleiri enn tvey.
Frítíðarkort verða veitt børnum og ungum at brúka til tænastur í kommuni, t.d. svimjihøll, bókasavn, ítrótt, tónleik, skóta v.m.
Starvsfólk á barnamenningarøkinum skulu kunna arbeiða 30/70, tvs. at 30 % er “egintíð” og 70 % av tíðini er saman við børnunum.
Tað eiga ikki at verða fleiri enn 4 børn í aldrinum 1-3 ár pr. vaksin í vøggustovum/dagrøkt. Viðgerðar- og sosialir stovnar skulu veita menniskjaligt uppmerksemi, nærveru og áhuga heldur enn sissandi og bindandi heilivág.
Skipanin “Barn” skal veitast út og tillagast føroysk viðurskifti, so at tilmelding av børnum til dagstovnar gerst smidligari.
Børn, sum bera brek ella hava serligan tørv, hava rætt til serkøna vegleiðing, stuðul og hjálp, frá føðing og so leingi tørvur er á tí.
Hjálpartólamiðstøðin skal fáast at virka! Bíðitíð frá mánaðum til ár, meðan hin sjúki situr sum fangar í egnum heimi, verður ikki góðtikin.
Rørðslutarnaði í rullistóli, sum í dag ikki fáa umlætting, tí lyftir á stovnum ikki virka, fáa tryggaðan hendan rætt!
Hitastigini í svimjihøllini skulu hækkast, so at børn trívast í hyljunum. Um so er, at nýggja svimjuhøllin er eins køld sum núverandi, skal hetta broytast.
Virka verður fyri sosialum íbúðum við leigugjaldi svarandi til inntøku.
Allar grundleggjandi útbyggingar og tørvir mugu fylgja við vaksandi fólkatalinum.
Virkishús og ungdómstilboð fyri ung mugu staðsetast í lokaløkjunum. Nærdemokratið verður ment við borgarafundum í lokaløkjum. Smábygdirnar í kommununi mugu hoyrast og tryggjast.
Stuðul verður veittur Sjósavninum til ætlaðu útbyggingina. Kommunan má hava eitt djóraherbergi við atknýttum djóralækna.
