Føroyingar vilja halda fram við at fiska eftir búrfiski, meðan ES vil banna allari veiðu eftir djúpfiskaslagnum.
Seinastu nógvu árini hava føroyingar fiskað nakað av búrfiski í altjóða sjógvi. Búrfiskur er ein djúpvatnsfiskur, reyðgulur við reyðum høvdi, og verður upp í 75 sentimetrar til longdar. Á okkara leiðum fæst hann fyri tað mesta djúpri enn 600 metrar, hann heldur til á 200 til 1700 metra dýpi, møguliga enn djúpri. Á sunnaru hálvu, við Nýsæland og Avstralia, hava teir í mong ár fiska nógvan búrfisk.
Búrfiskurin er norður gjøgnum alt Atlantshavið til Íslandryggin og útsynningshornið í føroyskum sjógvi. Á Miðatlantsrygginum, undir Grønlandi, við Labrador og Nova Scotia, Suðurafrika, Nýsæland, Avstralia og Kili.
Búrfiskur er góður matfiskur, sambært snar.fo, men nú vil ES steðga føroyska fiskiskapinum eftir búrfiski í altjóða sjógvi. Evropasamveldið legði tí fram eitt uppskot á ársfundinum hjá NEAFC, sum er fiskiveiðueftirlitsstovnurin í norðuratlantshavi, um at banna beinleiðis fiskiskap eftir búrfiski í altjóða sjógvi. Føroyar løgdu, eins og undanfarin ár, fram eitt uppskot um at loyva hesi veiðu.
Niðurstøðan var tó, at hvørki uppskotið vann frama.
- Fiskiskapurin eftir búrfiski er tó fevndur av yvirskipaðu samtyktini fyri fiskiskap eftir djúphavsfiskasløgum, sum semja var um at leingja fyri 2018, boðar Uttanríkis- og Vinnumálaráðið frá.
Føroyar eru limir í NEAFC í felags sendinevnd við Grønlandi. Hinir limirnir eru ES, Ísland, Noreg og Russland.
