Áhugi er eisini fyri landingar­miðstøðini í Klaksvík

Fríggjadagin fekk Landingar­mið­støðin á Toftum nýggjar eigarar, og nýggju eigararnir eru teir somu, sum síðani hálvan apríl í ár hava leigað landingarmiðstøðina frá trotabúnum.
Síðani P/F Landingar­mið­støð Føroya mátti gevast við­ virksemi sínum fyri páskir í ár, hevur bústjórin, Eyðfinnur Jacobsen, advokatur, havt ábyrgdina av búnum.
Virksemið lá bara stilt í ein lítlan mánað, tí síðani 15. apríl í ár hevur Sp/f Landingarmiðstøðin við Tofta­gjógv leigað land­ing­ar­mið­støðina frá trotabúnum.
Tað er hetta felag, Sp/f Landing­ar­miðstøðin við Tofta­gjógv, sum nú hevur keypt landingarmiðstøðina. Talan er um ein samanbygdan virkis­bygning við tilhoyrandi rakstrargøgnum.
Eigararnir í Sp/f Landingarmiðstøðini við Tofta­gjógv eru Niclas David­sen, Rúni Lamhauge, Per Mikkelsen og Sp/f Molva v/ Jóhan­nus M. Olsen og Poli Han­sen.
Niclas Davidsen er nevnd­ar­for­maður, og Rúni Lam­hauge er stjóri.
Eyðfinnur Jacobsen, bú­stjóri, vil einki siga um, hvussu nógv bygningur og rakstr­ar­gøgn á Toftum eru seld fyri.

Áhugi í Klaksvík
Tá Landingarmiðstøð Før­oya varð send til trota­búð­ar­við­gerð, var talan um landingarmiðstøðirnar bæði á Toftum og í Klaksvík, og enn liggur landingarmiðstøðin í Klaks­vík hjá trotabúnum og er ikki seld útaftur.
Eyðfinnur Jacobsen, bú­stjóri, sigur, at áhugi er eisini fyri landingarmiðstøðini í Klaks­vík, men enn er ikki kom­ið undir land við sølu av hesari.
- Vit eru í samráðingum við áhugaðar keyparar, men enn er ov tíðliga at siga nakað um, hvat fer at spyr­j­ast burturúr. Í øllum førum kann eg siga, at áhugi er fyri landingarmiðstøðini í Klaksvík eisini, sigur bú­stjór­in.