Trý sekund, fimm sekund og trý sekund. Tað var tíðarmarginalurin frá Sølmundi og aftur til Hvessing í trimum teimum fyrstu róðrunum í ár. Tí var tað lítið og einki, sum bendi á, at tað skuldi fara at eydnast hjá teimum í Sundalagnum at fáa bilbukt við tær á Skálafjørðinum.
Á Jóansøku vann Sølmundur fyri fjórðu ferð, men tá fóru guli og grøni báturin um málið mest sum stavn um stavn. Tað kundi boða frá tættari kapping í Vestmanna, men tann kappingin var av ongum: Stutt sagt tí Hvessingur hesa ferð smurdi Sølmund av!
Hvessingur legði bragdliga fyri, og Hvessingur var fremstur allan teinin. Tá ið bátarnir fóru um málið, var munurin nærri tveimum enn einari bátslongd. Sigurin hjá Hvessingi var tann mest sannførandi av øllum í kappingunum á Fjarðastevnu leygardagin, og sigurin var so mikið sannførandi, at tað í undanfarnu kappingunum bara eina ferð hevur eydnast Sølmundi at vunnið so sannførandi. Tað var, tá ið tær kappaðust á Sundalagsstevnu í heimasjógvi hjá Hvessingi.
Sølmundur, sum hevði vunnið allar fýra undanfarnu ferðirnar, noyddist hesa ferð rættuliga at stríðast fyri at varðveita næstfremsta plássið, og tað eydnaðist. Men kappingin frá Riddaranum var ógvuliga stór. Sølmundur er framvegis FM favorittur – trý stig frammanfyri Hvessing – men gongdin hesa ferð letur upp fyri, at talan kann gerast um spennandi FM finalu á Ólavøku.
trondur@sosialurin.fo
1 Hvessingur 04:48.23
2 Sølmundur 04:53.00
3 Riddarin 04:54.01
4 Gongurólvur 05:01.14
5 Jarnbardur 05:19.13
Støðan
1 Sølmundur 34
2 Hvessingur 31
3 Riddarin 23
4 Gongurólvur 22
5 Jarnbardur 12
6 Lómur 9
7 Kollfirðingur 2
