Eg ivist stórliga í um Vørn hevur heimild til hetta her. Tað sigur Henrik Old, løgtingsmaður fyri Javnaðarflokkin. Fyrr í vikuni fekk skiparin á Finni Fríða eitt sektaruppskot upp á 130.000 krónur í bót fyri ólógliga framferð í sambandi við fiskiskap eftir makreli.
Í hesum føri virkaði Finnur Fríði sum móttøkuskip hjá øðrum bátum, sum allir pumpaðu sína veiði í lastina í Finni Fríða, sum so sigldi til lands at avreiða. Endamálið var at hava makrelin so feskan, sum tilbar, tí tað hevur stóran týdning fyri dygdina.
Vørn sigur, at slíkt er ikki loyvt uttan loyvi frá Vørn, og tað høvdu tey ikki fingið, men Henrik Old ivast í um Vørn hevur grein í sínum máli og tað vil hann nú hava løgfrøðingar í Løgtinginum at kanna. Hann sigur, at hetta er ein framferðarháttur, sum hevur verið brúktur í Norðsjónum í eitt mannaminni fyri at hava so góðan fisk, sum tilber og hann hevur ikki funnið nakað í føroysku lóggávuni, sum forðar fyri hesum.
Hann vísir á, at lógin er broytt fleiri ferðir, men hann finnur einki í lógini, sum forðar fyri hesum. Tað er møguligt, at Vørn heldur seg til onkra kunngerð, men ein kunngerð kann ikki fara út um tað, lógin ásetur, sigur hann.
Sjálvur heldur hann, at hetta er tað einasta rætta at fiska í eini pulju, sum bátarnir hjá Varðanum hava gjørt í hesum føri, tí skjótari fiskurin kemur til viðgerar á virkinum, tess betri áðrenn. Tí heldur hann, at tað er púra burturvið at hava slíkar reglur.
