– Eg spældi við skaða ein part av kappingarárinum í fjør, og tá eg var til royndarvenjing í Skive, var eg framvegis skaddur. Nú eri eg so komin heimaftur, men havi gjørt stór framstig viðvíkjandi skaðanum, síðani eg kom aftur á Toftir. Tí vænti eg skjótt at vera klárur at spæla fótbólt aftur.
Tað sigur 27 ára gamli Jann Ingi Petersen, sum í vikuni skrivaði undir sáttmála við B68, so hann er knýttur at barndómsfelagnum hetta kappingarárið og tey bæði næstu við. Trupulleikin er tó, at av tí at flytingarvindeygað er latið aftur, kann hann ikki spæla við Vodafoneliðnum hjá B68 fyrr enn eftir summarsteðgin, tá vindeygað letur uppaftur.
– Tað verður nokk ikki so stuttligt at standa á síðulinjuni og hyggja at, meðan hinir spæla, sjálvt um eg eri klárur, men tað má eg so bara liva við. Eg venji við besta liðnum hjá B68 og kann spæla við liðnum í 2. deild, so eg má bara royna at gera meg kláran, til eg aftur havi loyvi at spæla við besta mansliðnum hjá B68, sigur Jann Ingi.
– Hinvegin er tað kanska ikki so galið allíkavæl, tí nú havi eg møguleika fyri at koma fyri meg í øllum góðum, uttan at eg fari ov skjótt fram. Tað kann í longdini koma at roynast betur fyri meg, og undir øllum umstøðum noyðist eg at taka tað, sum tað kemur.
Nakað eftir at fótbóltskappingin var liðug í fjør, flutti Jan Ingi Petersen til danska 1. deildarliðið, Skive IK, men skaðin gjørdi, at hann ongantíð veruliga kom í gongd har. Nú er hann so heima aftur og sær hóast alt ljósari upp á fótbóltin, tí hann merkir minni og minni til skaðan.
