Bæði føroyingaliðini í næstbestu norsku fótbóltsdeildini vóru í leiki í kvøld.
Meinhard E. Olsen spældi allan dystin, tá hann og liðfelagarnir í Mjøndalen á heimavølli leiktu javnt 1-1 móti gamla føroyingaliðnum, Bryne.
Mathias Bringaker legði Mjøndalen á odda í tíðini dómarin hevði lagt aftrat. Bryne javnaði miðskeiðis í seinna hálvleiki.
Mjøndalen er fjórðaftast í deildini við 22 stigum.
Fyri fyrstu ferð síðani 3. august fekk Gullbrandur í Horni Øregaard aftur spælitíð í dysti hjá Sandnes ULF.
Sandnes ULF tapti í kvøld fimta dystin á rað. Í kvøld tapti Sandnes 0-2 fyri Aalesund á útivølli. Tá Gullbrandur kom á vøllin í 81. minutti var støðan 2-0 til Aalesund.
Sandnes er langt aftast í deildini við bert 13 stigum.
Komandi leygardag klokkan 15 tekur Sandnes móti gamla føroyingaliðnum, Sogndal á heimavølli. Júst somu klokkutíð spælir Mjøndalen móti Åsane á útivølli.
