Norska tíðindastovan NTB skrivar, at fyrrverandi forsætisráðharrin í Noreg og núverandi NATO-stjóri, Jens Stoltenberg er settur sum nýggjur tjóðbankastjóri í Noreg.
Tjóðbankin, sum eitur Norges Bank, er tann óhefti fíggjarligi stovnurin í Noreg, sum umvegis pengapolitikk skal tryggja fíggjarligt støðufesti og prísjavnvág í Noreg.
– Vegna Norges Bank fari eg at ynskja Jens Stoltenberg tillukku við starvinum sum nýggjur tjóðbankastjóri.
– Eg kenni Stoltenberg sum ein virkna og dugnaligan búskaparfrøðing. Eg kenni meg tryggan við, at hann við drúgvu royndum fer at roynast væl í starvinum, skrivar fráfarandi tjóðbankastjórin Øystein Olsen, á heimasíðu bankans.
Jens Stoltenberg var forsætisráðharri í Noreg undir sorgarleikinum á Utøya í 2011, sum gav honum altjóða uppmerksemi fyri handfaring hansara av støðuni og áheitanir til sáttargerð heldur enn hatur.
Eftir at hava tapt eitt val í 2013 gjørdist Jens Stoltenberg aðalskrivari í Nato í 2014. Eitt starv hann eftir ætlan skal sita í til oktober í ár. Til hann tekur við starvinum, røkir varastjórin í tjóðbankanum Ida Wolden Bache starvið.
Tað hevur verið nógvur umrøða av møguligu tilnevningini av Jens Stoltenberg, tá norski forsætisráðharrin, Jona Gahr Støre úr Arbeiðaraflokkinum, hevur sagt seg vera ógegnigan í setanini vegna drúgva vinarlagið við Jens Stoltenberg.
Men Jonas Gahr STøre hevði ikki upplýst, at hann hevði verið í samband við Stoltenberg, sum í oktober setti seg í samband við hann og segði, at hann var áhugaður í starvinum.
Tað hevur fingið fleiri flokkar í Noreg at siga, at teir vilja hava kannað starvssetanina parlamentariskt líka mikið, hvør endar við at fáa starvið.
Jens Stoltenberg er fyrrverandi formaður í Arbeiðaraflokkinum. Og tí hevur tað verið reistur ivi um, hvørt hann kann røkja starvið sum púra óheftur politiskt og av norsku stjórnini.
– Stoltenberg eigur ikki at fáa hetta starvið. Ein fyrrverandi forsætisráðharri í slíkari støðu fer at sáa iva um lutin hjá tjóðbankanum. Og tað er óheppið at týdningarmikil størv í samfelagnum fara til sama skara av toppum í samfelagnum, sigur Kari Elisabeth Kaski úr vinstrasinnaða flokkinum áður sagt.
/ritzau/
