Norski forsætisráðharrin, Jonas Gahr Støre, fyllir 65 ár í dag, og á føðingardegnum er hann í ukrainska høvuðsstaðnum, Kyiv.
Men, tað eru ikki køkur og annað slíkt, sum eru á skránni hjá norska forsætisráðharranum í Ukraina í dag.
Einaferð í dag fer Jonas Gahr Støre at hitta ukrainska forsetan, Volodymyr Zelenskyj og forsætisráðharra landsins, Julija Svyrydenko.
Tað er russiska álopskríggið í Ukraina, sum er á dagsskránni.
Seinasta hálva árið hevur Russland hert álopini á Ukraina við bæði dronum og rakettum.
- Í einari avgerandi tíð hevur tað týdning at stuðla ukrainska verjustríðnum, sigur norski forsætisráðharrin í tíindaskrivi í morgun.
Týski varakanslarin, Lars Klingbeil, er eisini í Kyiv, har hann fer at tosa við landsins leiðslu um framtíðar trygdarváttanir.
