Jústines L. Justinussen sum hevur tikið nógv tøk fyri StÍF, bæði á vøllinum og uttanfyri vøllin fekk miklan heiður á 80 ára gallaveitsluni hjá StÍF, ið var hildin í bygdarhúsinum á Strondum ígjár.
Sambært heimasíðuni hjá StÍF var fagnaðurin sera stórur, tá formaður felagsins, Rúni Rasmussen kunngjørdi, at Jústines L. Justinussen var tilnevndur at vera heiðurslimur í felagnum.
Stif.fo skrivar: - Eitt heiðursskjal bleiv handað hondum við hesum teksti: “Við hesum verður váttað, at Jústines Leivssonur Justinussen er kosin av nevndini í St.Í.F. at vera heiðurslimur í Stranda Ítróttafelag. Hesin heiður verður latin Jústinesi Leivssyni Justinussen fyri hansara framúr og trúfasta arbeiði fyri St.Í.F. í mong ár sum leikari, venjari og ágrýtin stuðul.”
Jústines hevur verið og er framvegis sera virkin í St.Í.F. Hann er venjari hjá D14 og G10, og hann er altíð fúsur at hjálpa til og at leggja børnum og ungum lag á.
Í gjárkvøldi fekk hann eisini eitt lívstíðarkort. Hetta kortið gevur atgongd til allar heimadystir hjá St.Í.F. alt lívið. Skrivar stif.fo.
