Tróndur Mikkelsen og liðfelagarnir í HF Karlskrona leiktu í kvøld dyst á heimavølli í bestu svensku hondbóltsdeildini.
Á vitjan í Brinova Arena var Alingsås. Dysturin endaði við javnleiki 33-33. Alingsås javnaði til 33-33 við bert fimm sekundum eftir á klokkuni. Í steðginum var Alingsås á odda 21-17, og eitt skiftið var Alingsås á odda 27-22. Karlskrona kom sterkt aftur, legði seg á odda, men megnaði akkurát ikki at halda leiðsluni.
Tróndur skoraði tvey mál, og hann legði upp til tvey mál (assist).
Karlskrona er nummar níggju í deildini við 22 stigum. Ystad á sjeynda plássinum og Önnered á áttanda plássinum hava eisini 22 stig. Bert málmunurin skilir Trónd og liðfelagarnar frá einum endaspælsplássi.
Í morgin klokkan 15.15 spæla Ísak Vedelsbøl og liðfelagarnir í Sävehof dyst á heimavølli móti Malmö.
