Í morgin kemur kent kamarkór úr Keypmannahavn henda vegin at vitja.
Talan er um kamarkórið í Santk Annæ Gymnaisum í Keypmannahavn. Sankt Annæ er rættuliga kendur sangskúli í Keypmannahavn. Longu úr 3. flokki í fólkaskúlanum taka tey næmingar inn eftir, hvussu tey duga at syngja. Altjóða viðurkenda Københavns Drengekor er mannað við dreingjum úr hesum skúlanum. Tá er talan um dreingir úr 3. flokki og fram til røddin fer í yvirgang.
Í skúlanum eru eisini bæði big band og symfoniorkestur, og har eru eisini framúr gentukór og stórt gymnasiukór.
Og so er tað kamarkórið, sum hevur virkað síðani 2006, og sum í morgin kemur henda vegin at vitja. Í kórinum eru 28 sangarar, og kórleiðari er Flemming Windekilde.
Kórið arbeiðir fyrst og fremt við torførum klassiskum a cappella repertoire, men eisini saman við rytmiskum tónleiki og við nýmótans kompositiónum
Skráin er rættuliga fjølbroytt. Kórið syngur verk eftir Bach, Verdi, Whitacore, Grieg, Holmboe, Petterson-Berger, John Dowland, Finn Høffding, S. S. Schultz, Oluf Ring, B. Hjelmborg, J, Jersild, P. Schierbeck og Ives Grayston.
Fyrsta konsertin verður í Christianskirkjuni í Klaksvík leygardagin klokkan 16. Sunnukvøldið kl. 19.30 verður konsert í Fuglafjarðar kirkju. Fyrrapartin mánadagin syngur kórið í Studentaskúlanum á Kambsdali, fyrrapartin týsdagin er skúlakonsert í Havn, og týskvøldið klokkan 19.30 hevur kórið konsert í Vesturkirkjuni.
Kórið fer aftur til Keypmannahavnar seinnapartin mikudagin.
