Dimma skrivar, at Mikkjal Thomasen, venjari hjá KÍ, framdi harðskap í býnum næstseinasta leygarkvøld. Harðskapurin skal vera farin fram, meðan KÍ spælarar og viðhaldsfólk hátíðarhildu, at 20. meistaraheitð hjá felagnum var komið í hús. Sambært Dimmalætting gekk Mikkjal Thomasen, sum annars er útbúgving løgreglumaður, runt í havnargøtum, har hann var frá sær sjálvum og sló ein fótbóltsdómara, ein leikara í Betri Deildini, ein kringvarpsjournalist og ein málmansvenjara.
- Atburðurin er ikki í samljóði við virðisgrundarlagið hjá felagnum, har allir KÍ-venjarar eiga at vera fyrimyndarligir og álitisvekjandi. Vit hava fingið váttað, at Mikkjal Thomassen eftir hendingina hevur vent sær til teirra, sum hann hevur gingið ov nær og hevur biðið um umbering fyri sín atburð. Hesum hevur nevndin í KÍ virðing fyri, skrivar felagið í einnum tíðindaskrivi í dag.
- Høvuðsvenjarin og vit hava nú í skjótt átta ár verið í góðum og mennandi samstarvi, sum á mongum økjum hevur lyft KÍ upp á heimliga fótbóltstindin. Hesi árini hava givið okkum, viðhaldsfólki, hjálparfólki og stuðlum mangar ógloymandi upplivingar. Við hesum vil nevndin í Klaksvíkar Ítróttarfelag hervið boða frá, at nevndin ynskir at arbeiða fyri, at tað góða og mennandi arbeiðið saman við høvuðsvenjaranum, Mikkjal K. Thomassen kann halda fram, og vilja vit geva honum okkara fulla stuðul í komandi avbjóðingum, stendur í tíðindaskrivinum.
Fótbóltssambandið ger einki við málið, tí slíkt er eitt politimál, sigur aðalskrivarin, Virgar Hvidbro, í samrøðu við Dimma.fo.
