Kjak á Rás2 um brennandi spurning

Hvørja samgongu fara vit at fáa eftir næsta løgtingsval?

Tað er brennandi spurningurin, sum verður viðgjørdur í beinleiðis kjaki á Rás2 klokkan 16 í dag.

Spurningurin hevur verið dúgliga viðgjørdur, ikki minst eftir at Javnaðarflokkurin hevur útihýst Fólkaflokkin og eftir nýggju veljarakanningina í farnu viku.

Teir, sum fara at kjakast um spurningin, eru Aksel V. Johannesen, formaður í Javnaðarflokkinum, Janus Rein, tingmaður fyri Fólkaflokkin , og Jógvan Mørkøre, samfelagsfrøðingur, sum stóð fyri veljarakanningini hjá Sosialinum í farnu viku.

Óli Breckmann, sum skipar fyri sendingini, vísir á, at úrslitið av veljarkanningini, Fynd gjørdi fyri Sosialin í farnu viku, var ikki so nógv øðrvísi enn úrslitið í øðrum kanningum. Teir størru flokkarnir fingu allir oman fyri 20%, og teir smærru liggja í meðal oman fyri gáttina til at fáa umboðan.
 

Men tingmannabýtið í kanningini er øðrvísi enn tað er á tingi í løtuni. Samgonguni fær sambært kanningini bert 16 tingsessir, so henni restar ein tingmann í meiriluta.
 
Javnaðarflokkurin er stóri sigursharrin í kanningini og hevði fingið níggju tingmenn, sum er stór framgongd ímóti teimum seks tinglimunum, hann hevur.
 
Teir báðir størru samgonguflokkarnir, Sambandið og Fólkaflokkurin, missa í veljarakanningini ein tingmann í part.

- Men ein lítil flyting av atkvøðum frá teimum stóru flokkunum til teir smærru flokkarnar, ella frá Javnaðarflokkinum til Sambandsflokkin, kundi tryggja sitandi samgongu meirilutan aftur, tí Miðflokkurin heldur støðuna við tveimum tingsessum.
 
Framsókn missir ein tingmann og Sjálvstýrisflokkurin klárar ikki upp um minstamarkið og missir sín tingsess.
 
- Tá ið hetta er sagt, vita vit av royndum, at teir smærru flokkarnir hava lætt við at detta niður ímillum teir stóru í veljarakanningum, sum so javnar seg, tá val verður aftur, heldur Óli Breckmann.

Nýggja veljarakanningin vísir, at tey flestu vildu havt Aksel V. Johannesen sum okkara næsta løgmann. Tó var vóru tað bara 17 prosent, sum vilja hava hann til løgmann.

- Annað skuldi verið løgið, tá ið hann ikki hevur roynt henda leiklut fyrr og er formaður í tí flokkinum, sum fær størst veljarastuðul í kanningini.
 
Men tíverri vísti veljarakanningin ikki, hvørja samgongu tey spurdu kundu hugsa sær eftir komandi løgtingsval.