Í vár hava vit hoyrt um góðar útróðrardagar við snellu, bæði norðanfyri og vestanfyri, eins og útróðrarbátar, sum fiska við línu, eisini hava havt góðan útróður.
Tá tað er snelluútróður um várarnar, er tað serliga leiðirnar norðanfyri, sum eru áhugaverdar, men eisini vestanfyri og sunnanfyri hava menn fingið væl av fiski við snellu.
Hetta eru í flestu førum smáir bátar, og tað skal ikki nógv lot til norðanfyri á høgætt, at ikki er farandi út hjá bátunum, tí her verður skjótt óslætt.
Jóhan K. Joensen hjá Hans Egili & Synum, sum í fleiri ár hava landað bátarnar, sum rógva út av Eiði, segði herfyri, at bátarnir hava fingið væl av fiski, tá tað hevur verið roynandi.
Eitt kvøldið fyri umleið 2-3 vikum síðan stóðu eisini 24 kør av útróðrarfiski á bryggjuni á Sandi - alt frá einum útróðrardegi.
Men, hetta var bara ein dagur av fleiri góðum døgum hjá útróðrarbátum á Sandi.
Eitt føroyskt tíggjumannafar á Sandi hevði henda dagin eini 1500 pund, og onkur bátur við tveimum monnum hevði umleið 4000 pund - enntá tveir fylgjandi dagar á rað.
Tað er rættiliga góður snelluútróður.
Seinnapartin í dag høvdu vit orð á 74 ára gamla, Magnus í Hjøllum, Maggi róptur, sum býr í Saltnesi og hevur útróðrarbátin Heidi, sum er ein longdur Starlet 29.
Hann fiskar bara við línu og er sum oftast einsamallur á báti, men í dag er øðrvísi. Synunum dáma væl at vera við bátinum, tá teir eru heima, og tað liggur fyri hjá teimum.
- Í dag eri eg ikki við sjálvur, men stákist í skúrinum. Ein av synum mínum er á útróðri saman við einum vinmanni. Eg havi havt teir í telefonini, og nú knappliga er steindeytt.
Tað hava havt umleið 50 pund á línuna, og tað er nógv minni, enn tað hevur verið.
Magnus í Hjøllum sigur, at útróðurin í vár hevur annars verið góður, og tað hevur verið væl at fingið, bæði av hýsu og toski her eystanfyri.
- Vit koma nú inn í eina tíð av árinum, har útróður við línu eystanfyri hjá okkum vanliga ikki gevur so nógv, men vit vóna sjálvsagt, at onkrir dagar verða góðir inn ímillum.
Spurdur, hvussu honum dámar at stákast í skúrinum, meðan sonur og vinmaður eru á útróðri ein góðan dag, sum hendan, sigur hann, at tað dámar honum væl.
- Hetta er ikki fyrsti túrur hjá teimum. Teimum dámar væl at flóta, og teir gera nógvar túrar saman, sigur Magnus í Hjøllum, útróðrarmaður.
