Føroyska matstovan KOKS hevur ikki longur tvær Michelin-stjørnur.
Tað er greitt, nú árligu Michelin-stjørnunar í dag vórðu latnar í Helsinki.
KOKS, sum síðan 2021 hevur hildið til í lítlu bygdini Ilimanaq í Grønlandi, hevur fyri kortum boðað frá, at matstovan fer at lata aftur í eina tíð, tá sesongin í Grønlandi er av í heyst.
Hetta er uttan iva orsøkin til, at tað ikki ber til at varðveita stjørnunar. Tí Michelin kann jú ikki mæla fólki til at fara at eta á matstovum, sum ikki eru til.
Tá Noma lat aftur í 2017 hendi tað sama – tey mistu stjørnunar, men so fingu tey stjørnurnar aftur, enntá tvær í senn, tá tey høvdu latið uppaftur í 2018.
– Ring tíðini, men eg eri stoltur
Poul Andrias Ziska, høvuðskokkur á KOKS, harmast um tíðindini og sigur soleiðis í skrivligari fráboðan á Facebook-síðuni hjá KOKS:
– Hetta eru sanniliga ring tíðindi, men eg eri nakað so stoltur av okkara ferð og tí framúrskarandi arbeiði, vit hava gjørt saman.
– Av tí at vit steingja, er tað passandi, at guidin ikki tekur eina matstovu við, sum nærkast sínum enda. Hetta ger tó ikki stoltleikan minni fyri tað, eg føli, at vit hava megnað. Nú vit fara í holt við tað síðsta kapittlið hjá KOKS her í Grønlandi, fara vit at venda skuffilsinum til nakað gott og gera hesa sesonginia heilt serliga.
– Hjartaliga tillukku til allar tær nýggju Michelin-stjørnurnar og matstovurnar, sum hava varðveitt sínar stjørnur. Tit inspirera okkum øll, sigur Poul Andrias Ziska.
Áðrenn matstovan letur aftur, verður ein støkk-upp KOKS-matstova latin upp í Tivoli í Keypmannahavn í oktober, har borðreitt verður við grønlendsku matskránni.
Eftir ætlan letur KOKS upp aftur í fyrsta lagi í 2026, tá eigararnir hava funnið eitt stað at hava matstovuna fast. Roynt hevur verið at fingið ein fastan og passandi bústað í Føroyum, men tað hevur ikki eydnast.
KOKS fekk annars sínar tvær Michelin-stjørnur í 2019.
##med2##
Her er eitt yvirlit av Michelin-stjørnunum til matstovurnar í Danmark:
Matstovur við trimum stjørnum
Noma, København
Geranium, København
Jordnær, København
Matstovur við tveimum stjørnum
Frederikshøj, Aarhus
Henne Kirkeby Kro, Henne
Koan, København
AOC, København
Kong Hans Kælder, København
Kadeau, København
Alchemist, København
Matstovur við einari stjørnu
Domæne, Herning
Villa Vest, Lønstrup
Tri, Agger
Substans, Aarhus
Domestic, Aarhus
Gastromé, Aarhus
Ti Trin Ned, Fredericia
Lyst, Vejle
Syttende, Sønderborg
ARO, Odense
Marchal, København
Alouette, København
Jatak, København
Formel B, København
The Samuel, København
Søllerød Kro, København
MOTA, Nykøbing Sjælland
Frederiksminde, Præstø
Dragsholm Slot
Kadeau Bornholm, Åkirkeby
Restaurant Aure, København
