"Ein miljón fólk kunnu skrivað sum Liza Marklund, men bara ein kann skriva sum Bjørn Ranelid".
Hetta segði svenski høvundin Bjørn Ranelid um starvsfelag sín Lizu Marklund.
Hesin setningur var byrjan uppá eitt skeldarí um kvinniligu krimibøkurnar, ið hava havt stóra framgongd seinastu árini.
Eldri mannligir høvundar fylgdu Bjørn Ranelidsa dømi og kallaðu bøkurnar hjá Camillu Læckberg fyri novellir úr ungdómsblaðnum "Min hest".
At kvinnur skriva lættari, og kanska betri, hevur verið torført hjá royndum mannligum høvundum at svølgja, og at kvinnurnar hava selt nógv fleiri bøkur enn mannligu starvsfelagirnir er eisini komið illa við.
Men spurningurin er, um tað ikki eisini gagnar mannligu høvundunum, at nógvar bøkur verða seldar.
Um áhugin fyri bókunum veksur, gagnar tað bókaforløgnum og mentan, og í síðsta enda dryppar hetta nokk eisini á mannligu høvundarnar.
Drotningin og hennara prinsessur
Liza Marklund er tað navn, sum fyrst verður nevnt, tá ein tosar um norðurlendskar krimibøkur. Óivað er hetta, tí hon var fyrst, í 1998, við bókini um gerandishetjuna Anniku Bengtzon.
Tað, sum merkir nógvar av kvinnuligu krimibókunum, er, at tær blanda gerandisdagin og samband millum fólk við søgum um dráp og politiarbeiði.
Hetta lokkar ein breiðan flokk av lesarum, ið dáma væl at lesa um sambond millum fólk og bleytu virðini.
Arbeiða saman
Camilla Læckberg hevur sagt í einari samrøðu, at størsti munurin, sum hon heldur seg síggja millum kvinnuligar og mannligar krimibøkur er, at hetjan í mannligu bókunum er ein einsamallur, skrappur maður, ið oftani arbeiður sjálvur, meðan hetjan í kvinnuligu bøkrunum arbeiður saman við starvfeløgnum fyri at loysa morðgátuna.
Kvinnuligu rithøvundarnir halda eisini saman, men kappast samstundis eisini um somu lesarar. Allar eru umsettar til fleiri ymisk mál - Liza Marklund til heili 40 mál - og hava selt milliónatals bøkur.
At tær eru ríkar, er onki tær dylja. Camilla Læckberg er opin fyri, at hon skrivar fyri at tjena pening, og tað irriterar nógvar høvundar, ið hava torført at fáa bøkurnar út til almenningin.
- Eg eri stolt, tá eg síggi mítt stóra hús her í Stockholm, og eg hugsi, at hetta havi eg arbeitt fyri við mínum bókum, sigur Læckberg.
Arbeiðslív
Fleiri av krimidrotningunum hava starvast sum blaðkvinnur, áðrenn tær byrjaðu at skriva bøkur. Liza Marklund á svenska blaðnum Expressen, Hanne Vibeke Holst á Berlingske Tidende og Gretelise Holm á fleiri ymiskum bløðum og sum skúlastjóri á Danmarks Journalisthøjskole. Anne Holt var ráðharri og Karin Fossum var yrkjari.
Í samrøðum hava fleiri av teimum sagt, at ein grund til teirra framgongd er, at tær hava nógvar royndir frá arbeiðslívi og lívinum sum heild. Allar eru mammur og eru ella hava verið giftar.
- Tað er ótrúliga torført at skriva krimibøkur. Fyri at skriva eina góða bók má ein hava okkurt at siga, og tað krevur kunnleika og innlit í samfelagið, sigur Liza Marklund.
Liza Marklund
Fødd: 1962
Bústaður: Spania
Familja: Maðurin Mikael Aspeborg og trý børn
Bøkur: En plats i solen, Livstid, Nobels testamente, Det finns en särskild plats i helvetet för kvinnor som inte hjälper varandra, Asyl, Den röda vargen, Prime time, Paradiset, Studio sex, Sprängaren, Gömda
Camilla Læckberg
Fødd: 1974
Bústaður: Stockholm
Familja: Maður og trý børn
Bøkur: Isprinsessan, Predikanten, Stenhuggaren, Olycksfågeln, Tyskungen, Sjöjungfrun, Fyrvaktaren
Åsa Larsson
Fødd: 1966
Bústaður: Mariefred í Svøríki
Familja: Maður og tvey børn
Bøkur: Till dess din vrede upphör, Solstorm, Svart stig, Det blod som spillts
Anne Holt
Fødd: 1958
Bústaður: Oslo og í Frankaríki
Familja: Konan Tine Kjaer og dótturin Iohanne
Bøkur: Blind gudinne, Salige er de som tørster, Demonens død, Løvens gap, Uten ekko, Sannheten bortenfor, 1222, Mea culpa, I hjertet av VM. En fotballreise, Bernhard Pinkertons store oppdrag, Pengemannen, Presidentens valg, Det som aldri skjer, Det som er mitt
Karin Fossum
Fødd: 1954
Familja: Skild, tvey børn
Bústaður: Sylling í Norra
Bøkur: Evas øye, Se deg ikke tilbake, Den som frykter ulven, Djevelen holder lyset, Elskede Poona, Svarte sekunder, Drapet på Harriet Krohn, Den som elsker noe annet, Den onde viljen, I et annet lys, Søylen, De gales hus, Jonas Eckel, Natt til fjerde november, Brudd
Gretelise Holm
Fødd: 1946
Familja: maður, tvær døtrar og trý barnabørn
Bústaður: Keypmannahavn
Bøkur: Paranoia, Ö-morden, Krigsbarn, Ministermordet
Hanne Vibeke Holst
Fødd: 1959
Familja: Maðurin Morten Bruus og trý børn
Bústaður: Keypmannahavn
Bøkur: Dronningeofret, Kongemordet, Da jeg blev vred, Kronprinsessen, Nordjylland i MacWorld - udvikling eller afvikling? Ned til kvinderne – da Per blev til Pia, Min mosters migræne eller Hvordan jeg blev kvinde, En lykkelig kvinde, Det virkelige liv, Thereses tilstand, Hjertets,
Nattens kys, Mor er løbet hjemmefra, Til sommer, Ud af røret, Maja!
Hejsa Majsa!
