Á tíðindafundinum í FSF húsinum fyrrapartin mánadagin boðaði U-21 landsliðsvenjarin Eyðun Klakstein frá, at hann hevði úttikið 18 spælarar og at ein spælari fór at vera úttikin seinni.
Áki Johannesen hevur verið fastur maður í miðverjuni á hesum U-21 landsliðnum. Hann var ikki á listanum mánadagin, og nú er tað greitt, at B68 miðverjin verður ikki við í dystunum ímóti Kroatia á útivølli og Grikkalandi á heimavølli fyrst í næsta mánað.
-Áki hevur brotið bein í fótinum, og hann fer ikki at spæla aftur í ár.
Tað sigur Jákup á Borg, venjari hjá B68, sum harmast vegna álitismannin í verjuni bæði á U-21 landsliðnum og hjá B68.
Áki Johannesen var á vøllinum alla tíðina, tá ið B68 um vikuskiftið tapti 2-0 í Sørvági. Síðani hevur hann verið til kanningar hjá lækna, sum hevur staðfest, at eitt bein í fótinum er brotið, og at tað verður neyðug at gipsa fótin. Áki verður ikki leysur við gips og síðani serligan stivla fyrrenn um átta vikur, og tá verður landskappingin um at vera liðug.
21 ára gamli Áki Johannesen hevur verið millum teir fyrstu ellivu í øllum seks EM undankappingardystunum hjá U-21 landsliðnum í fjør og í ár. Síðani 2021 hevur hann spælt níggju U-21 landsdystir.
Á B68 liðnum, sum stríðist fyri lívinum í bestu deildini, er hann sambært FaroeSoccer spælarin, sum hevur verið mest á vøllinum higartil í ár.
