Men tað var ikki nógv goyggj at hoyra í vikuni, tá ið tíðindaleiðarin var vertur í Morgunsendingini hjá Útvarpinum, sum er at líkna saman við kommersielt poppradio. Í besta føri kunnu vit siga, at tað var ein vakthundur, sum lá á rygginum og blídliga murraði til lurtararnar.
Tíðindaleiðarin sat fyri opnari mikrofon og læs sms-boð frá lurtarnum, og tá ið hon var liðug við tað, spældi hon ein góðan hjá dreingjabólkinum One Direction. Sangurin »Kiss You« er eitt av stóru hittunum hjá populera tannáringabólkinum. Og tað var líka við, at tann blíði vakthundurin helt seg hava uppiborið ein koss hendan morgunin – men hann skuldi kanska heldur fingið eitt gúpp í afturpartin.
