Ljós ávirkar okkara samdøgurrútmu

Amerikanskir granskarar ávarða nú um, at nýtsla av elektriskum ljósi órógvar svøvnin fyri fleiri og fleiri menniskju.
Ein røð av kanningum vísa, at vant­andi svøvnur kann elva til kron­isk­ar heilsutrupulleikar, eitt nú hjartatrupulleikar, viknandi immun­verju og sukursjúku.
Ábendingar eru eisini um, at vant­andi svøvnur kann hava ávirk­an á heilasjúkur sum eitt nú alz­heimers.
- Ljós ávirkar okkara sam­døgur­rútmu meiri enn nakar heilivágur.
Tað skrivar ein av heimsins leið­a­ndi granskarum innan sam­døgur­rútmu, Dr. Charles Czeisler, Harvard Medical School í Boston, USA.
Greinin kann lesast í viðurkenda vísinda­liga tíðarritinum, Nature.

Ljós - ein orsøk
Granskarin vísir á, at nógvar ymisk­ar orsøkir eru til, at fólk ikki fáa nóg mikið av svøvni, men aftan fyri nógvar av hesum trupulleikum goym­ir seg ein avgerandi tekno­log­isk orsøk - elektriska ljósið.
Sambært granskaranum órógv­ar elektriska ljósið, bæði frá perum, sjónvørpum og øðrum elekt­r­isk­um tólum lívfrøðina í okkara sam­døgur­rútmu.