Í fjør skipaði Náttúrugripasavnið fyri teljing av lunda í Mykinesi og drunnhvíta í Nólsoy. Tølini eru nú uppgjørd.
Tað skrivar Náttúrugripasavnið.
Eftir at hava talt í 2011 og 2012 verður mett, at tað eru yvir 60.000 lundaholur vestanfyri bygdina í Mykinesi og úti í Hólmi. Holurnar vórðu býttar í fýra økir: Mykineshólmur, Lamba, Rógvukollur og Dalurin. Lamba hevur verið roknað sum besta lundaland í Føroyum. Hetta er eisini á góðari leið sambært tølunum hjá Náttúrugripasavninum, tí her vóru 22.000 holur. Í Dalinum eru eisini nógvar holur, heili 19.000.
Bæði í 2011 og í fjør vórðu 290 holur kannaðar, men eingin pisa var at síggja í nakrari. Einstakar pisur eru komnar undan, men árini hava verið sera ring hjá lundanum.
Í Nólsoy varð drunnhvítin taldur í Hvíturð og suður móti Nýggjurð. Í hesum økinum, sum er um 1 km, vóru um 4700 reiður tald. Drunnhvítin bølur eggini í holum og undir steinum og tí ber ikki til at telja hann beinleiðis heldur ikki reiðrini. Teljingin av honum verður tí gjørd við at spæla drunnhvítalát og lurta eftir svarum.
Teljingin er partur av tí virksemi, sum Innlendismálaráðið hevur sett í verk, í samband við at Mykines, Nólsoy og Skúgvoy eru lýstar at vera av altjóða týdningi grundað á ríka fuglalívið. Meira kann lesast um tað her.
Frágreiðingarnazr um teljingarnar kunnu lesast á heimasíðuni hjá Náttúrugripasavninum.
