Norska krúnprinsaparið hevur gjørt alt fyri at hjálpa Mariusi Borg Høiby.
Tað sigur hann sjálvur, tá hann mikudagin gevur frágreiðing í rættinum í Oslo, har hann er skuldsettur fyri 38 ákærur - harímillum neyðtøku og harðskap í nærsambondum.
Marius Borg Høiby viðmerkir áskoðanir, sum fyrrverandi unnusta hansara Nora Haukland kom fram, tá hon týsdagin varð avhoyrd í málinum, skrivar Aftenposten.
Her greiddi hon frá einum innslagi, har hon bað krúnprinsaparið í Noregi um at hjálpa Marius Borg Høiby í endurvenjing fyri rúsevnismisnýtslu.
– At hon situr og sigur, at tey ikki hava roynt at hjálpt. Mátin hon roynir at kasta tey undir bussin fyri at fáa uppmerksemi. Eg skilji tað fucking ikki. Eg skilji tað ikki. Tey hava ikki gjørt annað, sigur hann.
Marius Borg Høiby brestur í grát, meðan hann tosar um mammuna, krúnprinsessuna Mette-Marit, og stjúkfaðirin, Haakon krúnprins.
– Mamma og Hákon hava ikki gjørt annað enn at vera heimsins søtastu fólk - bæði til Noru og meg - og tey hava hjálpt mær á allar møguligar mátar.
– Og soleiðis sum hon lýsir tey – blívi eg so illur. Eg havi veruliga ikki orð fyri tí, sigur Marius Borg Høiby.
Nora Haukland segði týsdagin við rættin, at hon í 2023 bað Mette-Marit krúnprinsessu og Haakon krúnprins um at "gera okkurt" fyri at fáa Marius Borg Høiby til avvenjing. Tá høvdu Haukland og Høiby skilt seg.
– Marius fer í brúsu, og eg standi har saman við mammu hansara og Haakon, og so felli eg bara saman og sigi: "Nú mást tú hjálpa honum, sært tú ikki, at hann hevur brúk fyri hjálp?".
– Og tey søgdu: "Hetta er ikki tín ábyrgd", og eg segði: "Men ger okkurt, fá hann til avvenjingar, tað fer ikki at ganga væl," segði Nora Haukland.
Seinni - eftir at Høiby eftir øllum at døma var farin til avvenjing - sambært Noru Haukland hildu krúnprinsaparið ikki, at tað var fyri hann.
– Og so hevði eg eitt sindur av sambandi við tey aftaná, og tey skuldu senda hann til avvenjing, og tey skuldu gera tey tingini.
– Og knappliga vóru tey sum: "Men hetta við avvenjing er fíng, men júst hendan mánaðin og næsta mánað eru tað mest gomul fólk, sum eru har, og tað verður ikki so stuttligt hjá Marius at vera har," segði Haukland í rættinum.
Rættarmálið móti Marius Borg Høiby byrjaði fyrst í februar og skal eftir ætlan halda fram til 13. mars.
Marius Borg Høiby hevur longu fleiri ferðir verið á vitnisbeinkinum í málinum, har eitt stórt tal av øðrum vitnum og 'offrum' eisini eru boðsend.
15 av ákærunum snúgva seg um gerðir, sum Marius Borg Høiby skal hava framt móti Noru Haukland - harímillum harðskap. Haukland er kendur í Noregi sum ein influensari og luttekur í fleiri realitysendingum.
/Ritzau/
